«Փեզեշքիանի՝ Երևանում հնչեցրած «մտահոգություններն» անհիմն են և անընդունելի»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը. «Հայաստանի արտաքին քաղաքական ուղեգծի առանցքը պետք է դառնա ԵՄ-ին անդամակցելու հեռանկարը և Հայաստանի-ԱՄՆ ռազմավարական և երկարաժամկետ գործընկերությունը։ Սա ոչ թե որևէ «արտատարածաշրջանային ուժի ֆունկցիայի արտապատվիրակում» է, այլ Հայաստանի ինքնիշխանության կենսական դրսևորումը՝ ուղղված տնտեսության, ենթակառուցվածքների, իրավական համակարգի և պաշտպանական ներուժի որակական վերափոխմանը։ Վաշինգտոնում նախաստորագրված խաղաղության գործարքը և բացվող տնտեսական հնարավորությունները Հայաստանի համար ստեղծում են նոր միջավայր, որտեղ հաղորդակցությունները կարգավորվում են միջազգային իրավունքի և թափանցիկության չափանիշներով։
Այս համատեքստում Իրանի նախագահ Մասուդ Փեզեշքիանի՝ Երևանում հնչեցրած «մտահոգությունները» Հայաստանի ինքնիշխան որոշումների վերաբերյալ ոչ միայն անհիմն են, այլև պատմական հիշողության լույսի տակ՝ անընդունելի։ 2020 թվականի պատերազմի ընթացքում Իրանի դիրքորոշումը չեզոքության և փաստացի անգործության սահմանագծում էր՝ առանց որևէ գործնական քայլի, որը կկանխեր Արցախի կամ Հայաստանի դեմ կիրառված բռնությունը։ Վերջերս հենց Փեզեշքիանը այցելեց հայաթփված Ստեփանակերտ, որի նշանակությունն այսօր անտեսվում է, երբ նա փորձում է Երևանում դաս տալ Հայաստանի ընտրած ուղու վերաբերյալ։ Այս հակասությունները բացահայտում են ոչ թե մտահոգություն Հայաստանի անվտանգության շուրջ, այլ հավակնություն սահմանափակելու մեր ինքնիշխան որոշումները։
Ոչ մի երկիր՝ լինի Ռուսաստանը կամ Իրանը, իրավունք չունի վետո դնելու Հայաստանի գործընկերային ընտրությունների վրա։ Հայաստանը պատրաստ է գործակցել բոլոր հարևանների հետ՝ բացառապես այն պայմանով, որ հարգվում են մեր տարածքային ամբողջականությունը, սահմանների անխախտելիությունը և մեր ընտրած ռազմավարական ուղին։
«Մտահոգվելը» կարող է տեղ գտնել սեփական սահմանների ներսում։ Հայաստանի հանդեպ պարտադիր են ոչ թե հրապարակային խրատները կամ ցուցումները, այլ պայմանագրային պարտավորությունների կատարումը և շահերի համադրման վրա հիմնված հավասար համագործակցությունը։
Մեզ պետք չէ «3+3»-ի անվան տակ վերարտադրվող ուժային հավասարակշռության կեղծ օրակարգը, որն իր էությամբ ծառայում է միայն Մոսկվայի և Թեհրանի շահերին։
Հայաստանին անհրաժեշտ է իրավական կարգ, մրցունակ տնտեսություն և անվտանգային գործընկերություն այն ուժերի հետ, որոնք ապացուցել են իրենց պատասխանատվությունը՝ առաջին հերթին ԱՄՆ-ն ու Եվրոպական միությունը։
Այսուհետ տարածաշրջանում Հայաստանի հետ գործ ունենալիս բոլորը պետք է հաշվի առնեն պարզ և հստակ իրողությունը․ Հայաստանը շարժվում է դեպի ԵՄ անդամակցություն և խորացնում է իր ռազմավարական կապը ԱՄՆ-ի հետ։ Այս ուղին փոխադարձ հարգանքի և հավասարության հիմքի վրա է:
Հայաստանը ոչ ոքի ազդեցության գոտի չէ և չի լինելու։ Մեր պետականության և ժողովրդի ապագան որոշվում է ոչ թե Մոսկվայից կամ Թեհրանից հնչող մտահոգություններով, այլ Երևանում կայացված ինքնիշխան որոշումներով։ Մենք չենք ընդունելու ոչ խրատ, ոչ կոմպրոմիս մեր անկախության հաշվին։ Մեր ուղին հստակ է՝ եվրոպական և ամերիկյան գործընկերության միջոցով Հայաստանը դառնում է իրավական, ազատ ու մրցունակ պետություն։ Ով ուզում է մեզ հետ աշխատել՝ պետք է ընդունի այս իրողությունը։ Ով չի ընդունում՝ դուրս է մնում Հայաստանի ապագայից»։