«Նիկոլը խաբելու է՝ ասելով՝ խաղաղություն, բայց այս փաստաթուղթը նոր պատերազմի դուռ է»․ Նաիրա Զոհրաբյան

«Փաշինյանը փորձեց հասարակությանը վաճառել ամենապահանջարկված թոփ ապրանքը՝ խաղաղություն, որը չկա: Այն, ինչ ստորագրվեց Վաշինգթոնում, որևէ կապ չունի խաղաղության հետ»,- «168Ժամ»-ի հետ զրույցում անդրադառնալով Նիկոլ Փաշինյանի ուղերձին, այս տեսակետը հայտնեց քաղաքական գործիչ Նաիրա Զոհրաբյանը:

Նրա դիտարկմամբ՝ Փաշինյանը հերթական անգամ մանիպուլացրեց հասարակությանը. «Պատահական չէ, որ ինքն անընդհատ խոսում է համերգներից, անընդհատ ասում է, որ հասարակությունն ուզում է «տժժալ», ուրախանալ, ինքն այսպես բթացնում է հասարակության ամենազգայուն կետերը․․․ Իսկ դրա ֆոնին մենք տեսնում ենք վտանգավոր թեզեր իր ուղերձում, որ «մեր տարածքում կան ադրբեջանական հողեր»՝ նկատի ունենալով անկլավները, և ես չեմ բացառում, որ ինչպես Արցախը հանձնեց, այդպես էլ առաջիկայում «բանտիկը» վրան կապած կհանձնի Տիգրանաշենը և մյուս անկլավները»,- ընդգծեց Զոհրաբյանը՝ հավելելով, որ Ադրբեջանը որևէ փաստաթղթով չի ճանաչել ՀՀ տարածքային ամբողջականությունը։

«Նիկոլը հիմա խաբելու է՝ ասելով՝ խաղաղություն, բայց մենք պետք է բացատրենք, որ դա խաղաղություն չէ․․ Այս փաստաթուղթը առոչինչ է, խաղաղություն չէ, դա նոր պատերազմի դուռ է»,- ընդգծեց Զոհրաբյանը։