«Իսկ ի՞նչ է ասում Լիպարիտյանը». Վարդան Հարությունյան

Իրավապաշտպան Վարդան Հարությունյանի ֆեյսբուքյան գրառումը. «Դե, որ այդքանդ ասել եք՝ ես էլ ասեմ․ ցանկացած հոդված, ցանկության դեպքում, կարելի է քննադատել, իսկ շատ մեծ ցանկության դեպքում սեփական լուրջ կամ անլուրջ, հորինված կամ իրական փաստարկներով կարելի է ջախջախել։ Ցանկացած հոդվածում, հատկապես՝ մեծ հոդվածում, թերություններ ու անճշտություններ, որոնելու դեպքում, անկասկած, կգտնվեն։
Խիստ մարդկային ցանկություն է՝ կարդալ սեփական տեսակետներին համընկնող հոդվածներ, տեսնել ու համոզվել, որ այլոք էլ ճիշտ ու ճիշտ քեզ նման են մտածում, ուրախանալ դրանից ու ծափահարել։ Բայց միշտ չէ որ այդպես է լինում։ Ու ․․․ ծնվում է հիասթափությունը։
Ժիրայր Լիպարիտյանի հոդվածը նրա նախկին շատ հետեւորդների ու համախոհների է հիասթափեցրել։
Իսկ ի՞նչ է ասում Լիպարիտյանը։ Ասում է, որ փաստաթուղթը համաձայնեցրել, ապա Թրամպի միջնորդությամբ ստորագրել են երկու կողմեր՝ պարտված Հայաստանը եւ հաղթած Ադրբեջանը։ Այս իշխանությունների որակների պարագայում Հայաստանն ավելին ստանալ չէր կարող։ Այլ բանակցողների դեպքում հավանաբար այլ փաստաթուղթ ստորագրվեր, բայց բանակցել են այս մարդիկ ու, վերջին հաշվով, ստորագրվել է այս փաստաթուղթը։ Ասում է, որ սա փաստ է։ Ապա քննարկում է, թե այս փաստաթղթի կենսագործման դեպքում, եթե հայկական կողմը ճիշտ աշխատի, ինչ օգուտներ կարող է ստանալ։
Լիպարիտյանը իրողություններն է արձանագրել, ապա՝ խոսել հնարավորությունների մասին։ Նեղանալ պետք է ոչ թե Լիպարիտյանից, այլ այս իրողությունը ստեղծողներից»։