«ՌԴ կախվածությունից ազատվելուն ուղղված ջանքերը չպետք է տանեն ուրիշ կախվածությունների»․ Արթուր Սաքունց

Իրավապաշտպան Արթուր Սաքունցի ֆեյսբուքյան գրառումը․ «Հայաստանի Հանրապետությանը իր անկախության ողջ ժամանակաշրջանում Ռուսաստանի Դաշնությունից ինստիտուցիոնալ կախվածության կարգավիճակում ձևավորածներն այնքան են համոզված այդ կախվածության անդառնալիության մեջ, որ ցանկացած, թեկուզ փոքր քայլ Հայաստանի կողմից՝ հաղթահարելու այդ կախվածությունը, համարում են անհնար, կամ ամեն կերպ ձգտում են ներկայացնել որպես անհնարին, արկածախնդրություն:
Ինչո՞ւ:
Որովհետև գիտեն, գիտակցում են իրենց ստեղծած կախվածության խորությունը, տարածվածությունը, որը նման է քաղցկեղի:
Մյուս կողմից, քանի որ ցանկացած հաջողություն այդ քաղցկեղային կախվածութունից ազատվելու ուղղությամբ, կհանդիսանա իրենց ողջ քաղաքական գոյության վախճանը:
Այսինքն, հանդիսանում են Հայաստանի Հանրապետությանը Ռուսաստանի կայսրությունից մշտապես քաղցկեղային կախվածության մեջ պահելու հայեցակարգի կրողներ:
Եվ այդ «քաղցկեղի» ամեն մի սրացումների ժամանակ փոքր ցավազրկման դոզաների փնտրտուքը որպես պետության փրկության ջատագովություն են ներկայացնում:
Ռուսաստանի կայսրությունից անխուսափելի մահվանը տանող այս քաղցկեղային կախվածությունից ազատվելուն ուղղված ջանքերն իհարկե չպետք է հանգեցնեն մեկ այլ քաղցկեղային կախվածությունների:
Դրա համար է ոչ բլոկային, փոքր, բայց ոչ չեզոք պետության հայեցակարգը առավել քան կենսական Հայաստանի Հանրապետության որպես անկախ, ինքնիշխան պետության գոյության ու զարգացման համար»։