ՊԵԿ-ը հորդորում է բացառել ոչ իրական պատվիրատուների անվամբ արտահանումը

Պետական եկամուտների կոմիտեն ֆեյսբուքյան էջում հրապարակել է հայտարարություն, որում նշված է․ «Պետական եկամուտների կոմիտեն հորդորում է բացառել ոչ իրական պատվիրատուների անվամբ արտահանման ձևակերպումներից։
​ՊԵԿ-ը պարբերաբար ստանում է ազդակներ, որ ՀՀ-ից դեպի այլ երկրներ ապրանքներ արտահանելիս մաքսային հայտարարագրում, ինվոյսում և բեռնափոխադրման փաստաթղթերում ՀՀ առանձին տնտեսվարողներ, որպես ապրանքների ստացող կողմ, նշում են այնպիսի գնորդների տվյալներ, որոնք իրականում չեն հանդիսանում ապրանք պատվիրողը կամ գտնվում են լուծարման գործընթացում կամ արդեն իսկ լուծարված են:
Նման գործողության արդյունքում՝ հետագայում այդ ապրանքները ստացող երկրում հայտնվում են ստվերային շրջանառության մեջ և դուրս են մնում հսկողությունից: Խնդիրն առավել ընդգծված է ՀՀ-ից ԵԱՏՄ անդամ մյուս երկրներ արտահանման գործընթացում:
Նման վարքագիծը հանգեցնում է նաև ստացող երկրի անցման կետում (օրինակ՝ Վերին Լարս) ուժեղացված հսկողության (այդ թվում՝ բարեխիղճ արտահանողների նկատմամբ) և բացի այդ, տվյալ երկրի պատկան մարմինների կողմից նման հանգամանք պարզվելու դեպքում՝ այդ ապրանքները վերադարձվում կամ արգելապահվում են:
​Հաշվի առնելով վերոգրյալը՝ Կոմիտեն հորդորում է ՀՀ արտահանողներին բացառել գործարքի հնարավոր ոչ իրական կողմի անվամբ փաստաթղթերի կազմումից և նման սուբյեկտների անվամբ ապրանքների ձևակերպումից»: