«Դա նվեր էր Փաշինյանին․ իշխանության մոտ լավ է ստացվում ժողովրդին ֆռռացնելը»․ Արամայիս Աղաբեկյան

«Այն, որ հայտարարում են, թե օգոստոսի 8-ից հետո խաղաղություն է հաստատվել, ավելի շատ շոու է, և գիտակցաբար են Փաշինյանին պարգևել այդ շոուն կազմակերպելու հնարավորությունը»,- այս մասին «168Ժամ»-ի հետ զրույցում նշել է Արցախի Հանրապետության ԱԺ պատգամավոր Արամայիս Աղաբեկյանը։

«Դա շոու է նրանով, որ նախ՝ այդ փաստաթղթի բովանդակության ցանկացած կետ կարելի է 10 տարբեր ձևով մեկնաբանել: Օրինակ՝ երբ ասում են՝ անխոչընդոտ ճանապարհ, ամեն մեկն իր մեկնաբանությունն է տալիս․ Արարատ Միրզոյանը հարցազրույց է տալիս, լրիվ ուրիշ երանգներ է տալիս այդ կետին: Ալիևը գնում է Ադրբեջան և ասում՝ որևէ հայ մաքսավորի չպետք է տեսնենք, հայերի հետ չպետք է որևէ առնչություն ունենանք այնտեղ… Քարոզ է տարվում, թե ամերիկյան կողմի պարտադրանքով փաստաթուղթ է սա, բայց նախաստորագրման մասին, որպես տերմին, առաջինը խոսել է Ալիևը, ինքն է ասել, որ պատրաստ են գնալ նախաստորագրման․․․ Սա Փաշինյանի համար էր նվեր, որպեսզի 2026-ի ընտրություններում օգտագործի և թափահարի՝ որպես ձեռքբերում, ընտրություններում վերընտրվելու համար, որովհետև Փաշինյանն Ալիևի համար հարմար իշխանություն է»,- նշեց նա՝ ընդգծելով՝ ադրբեջանական քարոզչամեքենան պետք է միլիարդավոր դոլարներ ծախսեր, որպեսզի հնարավորություն ունենար Հայաստանի ներսում այնպիսի թեզեր տարածել, ինչպես դա անում են արամզավենիչները, ՔՊ-ականները։

Անդրադառնալով դիտարկմանը, որ ըստ Արարատ Միրզոյանի՝ խաղաղությունը հաստատված է, և «եթե ԵԱՀԿ ՄԽ-ն լուծարելու համար սպասեին խաղաղության պայմանագրի ստորագրմանը, ապա աշխարհը կմտածեր, թե Հայաստանն ուզում է ֆռռացնել», Աղաբեկյանը նշեց, որ իշխանություններն ավելի շատ մտածում են՝ ոնց հայ ժողովրդին ֆռռացնեն, քան թե՝ աշխարհը ինչ կմտածի. «Իրենց մոտ շատ լավ ստացվում է հայ ժողովրդին ֆռռացնելը: Մինչև այս պահն է, իհարկե, ստացվում: Հուսով եմ, որ այն ասացվածքը, որ «ժողովրդին կարելի է ինչ-որ մի ժամանակ խաբել, բայց մշտապես խաբել չի կարելի», ի վերջո աշխատելու է: Այս պահին ֆռռացնողի կարգավիճակում էլի իրենք են, բայց աշխարհի մակարդակում ֆռռացնել իրենց մոտ չի ստացվում»: