«Վեդի համայնքում հոսանքի ամենօրյա տատանումները գույքային մեծ վնաս են պատճառում»․ Մհեր Կարագոզյան

«Հանրային վերահսկողություն» ՀԿ նախագահ Մհեր Կարագոզյանը ֆեյսբուքյան իր էջում գրել է․ «Վեդի համայնքում էլեկտրամատակարարման խայտառակ վիճակն ու քաղաքացիների իրավունքների կոպիտ խախտումները
Արարատի մարզի Վեդի համայնքի մի շարք բնակավայրերում, մասնավորապես Արալեզ բնակավայրում, արդեն երկար ժամանակ է, ինչ էլեկտրամատակարարումն իրականացվում է անորակ և անընդհատ խափանումներով։ Գրեթե ամենօրյա հոսանքի անջատումները և լարման կտրուկ տատանումները ոչ միայն խաթարում են մարդկանց բնականոն կյանքը, այլև պատճառում են գույքային մեծ վնաս․ փչանում են քաղաքացիների կենցաղային տեխնիկան, էլեկտրասարքավորումները, տուժում են փոքր բիզնեսները։
Այս իրավիճակում մարդիկ շարունակում են անխափան վճարել էլեկտրաէներգիայի դիմաց, բայց փոխարենը ստանում են անորակ ծառայություն։ Սա ոչ թե պարզապես սոցիալական դժգոհություն է, այլ հստակ իրավունքի խախտում։
Ըստ ՀՀ Սահմանադրության․
Յուրաքանչյուր քաղաքացի ունի արժանապատիվ կյանքի իրավունքի երաշխիքներ,
Պետական մարմինները պարտավոր են ապահովել հանրային ծառայությունների մատուցումը,
Սեփականության իրավունքը պաշտպանված է, և ոչ ոք իրավունք չունի անօրինականորեն զրկել քաղաքացուն իր ունեցվածքից։
Ըստ ՀՀ «Էներգետիկայի մասին» օրենքի․
Էլեկտրաէներգիայի մատակարարը պարտավոր է ապահովել անխափան և պատշաճ որակով մատակարարում,
Մատակարարի կողմից ծառայության անորակ մատուցման դեպքում քաղաքացիները իրավունք ունեն պահանջել վնասի հատուցում։
Այսօր Վեդիի և Արալեզի բնակիչները հայտնվել են այնպիսի իրավիճակում, երբ․
վճարում են որակյալ և անխափան էլեկտրամատակարարման համար, բայց ստանում են խափանումներով ու վտանգավոր տատանումներով ծառայություն, արդյունքում կրում են գույքային վնաս և կանգնում անվտանգության լուրջ սպառնալիքի առաջ։
Մենք պահանջում ենք․
1. Անհապաղ վերացնել Վեդի համայնքում էլեկտրամատակարարման խափանումների և լարման տատանումների պատճառները։
2. Իրականացնել տեխնիկական արդիականացում՝ ապահովելով կայուն և հուսալի համակարգ։
3. Սահմանել փոխհատուցման հստակ մեխանիզմներ՝ այն քաղաքացիների համար, ովքեր նյութական վնաս են կրել անորակ ծառայության հետևանքով։
4. Պետական վերահսկող մարմինները պարտավոր են պարտադրել մատակարարին գործել օրենքի և պայմանագրային պարտավորությունների շրջանակում։
Քաղաքացիների իրավունքները չեն կարող անընդհատ ոտնահարվել։ «Հանրային վերահսկողություն» ՀԿ-ն շարունակելու է բարձրաձայնել և պահանջել օրինական լուծումներ՝ մինչև խնդիրը վերջնական լուծում ստանա»: