«ԵՄ-ն հստակ ցույց է տալիս՝ պատրաստ է խորացնել գործընկերությունը»․ Արման Բաբաջանյան
116
Այսօր, 03:06
ԱԺ նախկին պատգամավոր Արման Բաբաջանյանի ֆեյսբուքյան գրառումը. «ՀՀ անկախության տոնի նախօրեին Երևանում կայացած վերջին հանդիպմամբ արձանագրվեց, որ Հայաստանի և ԵՄ-ի համագործակցությունը հասել է որակապես նոր հանգրվանի։ Սա այլևս գործընկերության որակապես նոր չափում է, որտեղ Եվրոպական միությունը տրամադրում է ֆինանսական, տեխնիկական և քաղաքական գործիքակազմ, իսկ Հայաստանը պարտավորվում է իրականացնել կոնկրետ ու չափելի բարեփոխումներ։ Այս իրողությունն ինքնին պարտադրում է Հայաստանի իշխանություններին անհապաղ և համարձակ քայլեր։ Առաջին՝ պետական ինստիտուտների կայացումը և իրավական համակարգի խորքային բարեփոխումը․ դատական անկախության ամրապնդումը, կոռուպցիայի դեմ անվերապահ պայքարն ու հաշվետու կառավարման համակարգի ստեղծումը։ ԵՄ-ն ակնկալում է գործնական արդյունքներ՝ դատական մարմինների վստահելիության աճով, հակակոռուպցիոն գործերի անաչառ քննությամբ և հանրային կառավարման թափանցիկությամբ։ Երկրորդ՝ ժողովրդավարական գործընթացների անշեղ պահպանումը։ 2026 թվականի ընտրություններին ընդառաջ ԵՄ-ն հատկապես կարևորում է ընտրական համակարգի ամրապնդումն ու ազատ ու արդար ընտրությունների կազմակերպումը։ Հայաստանը պետք է ապահովի ընտրական օրենսդրության կատարելագործում, ընտրությունների վարչարարության թափանցիկություն և անկախ վերահսկողություն։ Սա այն հիմքն է, որից կախված է ոչ միայն արտաքին վստահությունը, այլև երկրի ներսում ժողովրդավարության զարգացումը։ Երրորդ՝ տնտեսության եվրոպականացման ուղիների խորացում։ ԵՄ-ն արդեն գործարկել է բազմամիլիարդ ներդրումային փաթեթներ, սակայն դրանց արդյունավետությունն ուղղակիորեն պայմանավորված է Հայաստանի կողմից իրականացվող ոլորտային բարեփոխումներով՝ առևտրի դիվերսիֆիկացիա, կանաչ էներգիա,, տրանսպորտային ենթակառուցվածքների զարգացում։ Այս նախագծերը պետք է դառնան համազգային ռազմավարության մաս՝ ամրապնդելով Հայաստանի դերը որպես տարածաշրջանային հանգույց։ Չորրորդ՝ վիզաների ազատականացման գործընթացի անշեղ իրականացում։ Եվրոպական միությունը ակնկալում է, որ Հայաստանը հետևողականորեն կիրագործի վիզաների ազատականացման համար անհրաժեշտ բոլոր չափորոշիչները։ Սա վերաբերում է ոչ միայն մեր քաղաքացիների ազատ տեղաշարժի հնարավորությանը, այլև հանդիսանում է վստահության հստակ ցուցիչ՝ ինչպես երկրի ներսում հասարակության համար, այնպես էլ արտաքին գործընկերների առջև՝ ապացուցելով մեր պետականության հետևողականությունը, կառավարման թափանցիկությունը և եվրոպական արժեքներին հավատարիմ ընթացքը։ Վերջապես՝ խաղաղության օրակարգի նկատմամբ Հայաստանի հստակ, կառուցողական և հետևողական դիրքորոշումը։ ԵՄ-ն պատրաստ է ներդրումներ անել խաղաղության դիվիդենտների իրագործման համար։ Այս ամենը պահանջում է Հայաստանից անհապաղ և վճռական գործողություններ։ Այլևս անելիք չկա հետաձգելու․ ԵՄ-ն հստակ ցույց է տալիս, որ պատրաստ է խորացնել գործընկերությունը, սակայն դրա դիմաց ակնկալում է համարժեք քաղաքական կամք, ինստիտուցիոնալ հետևողականություն և բարեփոխումների գործնական արդյունքներ։ Հայաստանը հիմա կանգնած է իրադարձությունների այն հանգրվանում, երբ յուրաքանչյուր քայլ կշռադատվելու է ոչ թե հայտարարություններով, այլ կատարողականով»։
