«Արևային էներգիայի ուղղությամբ արված ջանքերը ջուրն են լցվելու»․ Հայկ Խանումյան

Արցախի ՏԿԵ նախկին նախարար Հայկ Խանումյանի ֆեյսբուքյան գրառումը․ «Վերջին տարիներին Հայաստանում զգալիորեն ավելացել է արևային էներգիայի արտադրությունը։ Դրան նպաստել է պետական սուբսիդավորումը։ Բազմաթիվ ընկերություններ լուրջ կարողություններ են զարգացրել այս ուղղությամբ։ Ներգրավել են մասնագետներ, այդ թվում արտերկրից, ռեսուրսներ են ծախսել մասնագետներ պատրաստելու և վերապատրաստելու վրա, արհեստագործական ուսումնարանները սկսել են աշկերտներին ուսուցանել այս ուղղությամբ։ Հիմա կառավարությունը որոշել է արևային կայանների տեղադրումը չսուբսիդավորել՝ պատճառաբանելով արևայինի մեծ բաժինը էներգետիկ համակարգում։ Սա միգուցե ճիշտ որոշում է, սակայն հաջորդ քայլերի բացակայությունը բերելու է ոլորտի լուրջ ճգնաժամի՝ եղած մասնագիտական կարողությունների թուլացման, ընդհուպ վերացման, ընկերությունների սննկացման և այլն։ Իսկ հաջորդ քայլերը հետևյալն են. սուբսիդավորել ջերմային պոմպերի տեղադրումը (սա թույլ կտա ջեռուցման համար կրճատել գազի օգտագործումը), սուբսիդավորել կուտակիչ հզորությունների ստեղծումը (սա կվերացնի արևային էներգիայի անկառավարելիությունը և ռիսկերը)։ Սուբսիդավորման գումարները կարելի է գտնել կանաչ էներգիան խրախուսող միջազգային հիմնադրամներից։ Եթե կառավարությունը արագ չկատարի այս քայլերը, ապա արևային էներգիայի ուղղությամբ արված տարիների ջանքերը ջուրն են լցվելու։ Շուտով կսկսվեն բյուջեի քննարկումները, դա լավագույն ժամանակահատվածն է նման հարցերի լուծումը ենթադրող ծրագրերը բյուջեում տեղադրելու համար»։