«Պարտության պատճառների մասին խոսելիս պետք է հիշել նաև Փաշինյանի խոստովանությունը»․ Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Ուղիղ 5 տարի առաջ այս օրը, թշնամին հարձակվեց մեր վրա: 44 օր ձգվող տատերազմի ընթացքում երկրի ռազմաքաղաքական ղեկավարությունը չկազմակերպեց պահեստազորի համալրված և համակարգված ներգրավումը։ Նախապես հաստատված պլանների փոխարեն իրականացվում էր ջոկատների հավաքագրման և «ռանդոմ» եղանակով հրամանատարների ընտրության գործընթաց։ Այս ամենը վկայում էր ոչ թե պետական մոտեցման, այլ քաոսի և անկազմակերպվածության մասին։
Պարտության պատճառների մասին խոսելիս անպայման պետք է հիշել նաև այն խոստովանությունը, որը կատարել է Նիկոլ Փաշինյանը։ Նա բաց տեքստով ասել է, որ մեր վզին թոկ էր գցած, և այդ թոկը Արցախ աշխարհն էր։ Ըստ նրա՝ Արցախը հանձնելով մենք ազատվել ենք այդ թոկից։ Սա նշանակում է, որ պատերազմը ոչ թե անակնկալ պարտություն էր, այլ կանխավ մտածված գործընթաց, որը վերջնարդյունքում բերեց խաղաղ բնակչության բռնի տեղահանման։
Փաստացի պատերազմի արդյունքում ի՞նչ էլ եղավ հայ ժողովրդի հետ, միևնույն է, այդ ամենի թիվ մեկ պատասխանատուն և թիվ մեկ մեղավորը, իրեն պարտված չհամարեց:
Այս ամենի հետևանքով մենք ոչ միայն կրեցինք պատմական կորուստներ, այլ այսօր էլ ականատես ենք դառնում այն իշխանության քաղաքականությանը, որը պետությունը տանում է բանակի թվաքանակի և բյուջեի կրճատման ճանապարհով»։