«Ձեր թիմն այլևս հակազգային համակարգ է»․ Մհեր Մելքոնյանը՝ Սարիկ Մինասյանին

ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը․ «Երեկ հակահայկականություն քարոզող թիվ մեկ հաղորդման հյուրը Գյումրու ավագանու «Քաղաքացիական պայմանագիր» խմբակցության ղեկավար՝ Սարիկ Մինասյանն էր, ով հայտարարեց՝ «Նա, ով կմտածի, որ ես, իմ քաղաքական թիմը, մեր ընկերներից որևէ մեկը Հայաստանը մտադիր է տանելու վիլայեթացման, նա թրքահպատակ, ռուսահպատակ ստրուկ է»։
Այսպիսի անհեթեթ և ապազգային հայտարարությունները վախի և թուլության հետևանք են:
Ես չեմ մտածում, ես ասում եմ՝ ուղիղ և փաստացի.
-Ձեր քաղաքական թիմը հանձնեց Արցախը։
-Ձեր իշխանությունը դավաճանեց արցախահայությանը, հազարավոր մարդկանց թողնելով հայրենազուրկ։
-Դուք նպատակային կերպով պայքարում եք հայի ինքնության դեմ:
-Դուք և ձեր թիմակիցները համառորեն ու բացահայտ աջակցության դրսևորումներով որդեգրել եք թուրք-ադրբեջանական օրակարգը։
-Ձեր թիմի կառավարման օրոք է, որ հոգևորականների նկատմամբ կիրառվում են քրեական հետապնդումներ և սրբազաններ են ապօրինաբար կալանավովում (Հա, եթե մոռացել եք հիշեցնեմ, որ Ձեր քաղաքական թիմի, ընկերների շնորհիվ է, որ Շիրակի թեմի առաջնորդ Գերաշնորհ Տ. Միքայել արքեպիսկոպոս Աջապահյանը ևս շինծու քրեական գործի շրջանակներում գտնվում է անազատության մեջ):
-Դուք պայքարում եք Հայաստանյայց Առաքելական Սուրբ Եկեղեցու հեղինակության և հասարակական դերի դեմ։ Սահմանափակելով և հարցականի տակ դնելով ազգային արժեքների պահպանման ինստիտուցիոնալ հիմքերը։
-Ձեր շարքերում կան մարդիկ, որոնք հրապարակայնորեն ուրանում են Հայոց Ցեղասպանությունը և հարցականի տակ դնում դրա ճանաչման փաստարկները։
-Ձեր դավաճանական քաղաքականությունը նպատակային կերպով կազմաքանդեց մեր բանակը, քայքայեց վստահելիության կապը զինված ուժերի և ժողովրդի միջև։
-Դուք նպատակաուղղված պայքարում եք մեր ժողովրդի համար սրբություն հանդիսացող խորհրդանիշների դեմ՝ ժխտելով պատմական հիշողությունը, ավանդույթները, եկեղեցական ու ազգային ինստիտուտները։
Ձեր թիմն այլևս չի ներկայացնում պետականություն։ Դուք ներկայացնում եք հակազգային համակարգ, որը իր գոյությունն ապահովում է խաբեությամբ, թշնամու շահերին ծառայելով, ազգային արժեքների փլուզմամբ և սեփական ժողովրդի դեմ մղվող գաղափարական պատերազմով։
Դուք կազմաքանդեցիք ամեն ինչ։
Դավաճանեցիք ձեր իսկ քաղաքացիներին։
Բացատրություն չտվեցիք ոչ մեկին, բայց շարունակեցիք պիտակավորել բոլորին։
Դուք չունեք այլևս բարոյական, քաղաքական կամ պատմական լեգիտիմություն։ Դուք կորցրել եք այն՝ նույն պահին, երբ ժխտեցիք ազգային արժեքները։
Սա վերջնագիծ է՝ պետություն ունենալու կամ չունենալու։
Լավ հիշեք՝ պատասխան տալու ժամանակը մոտ է։
Ոչ միայն քաղաքական ձախողումների, այլ՝ գիտակցված դավաճանության, ազգային ինքնության դեմ մղված պայքարի, բանակի կազմաքանդման, հոգևոր սրբությունների ոտնահարման և Արցախը հանձնելու համար»։