Հակակոռուպցիոն կոմիտեն հեռախոսազրույցի ձայնագրություն է հրապարակել

Հակակոռուպցիոն կոմիտեն հեռախոսազրույցի ձայնագրություն է հրապարակել՝ հայտնելով, որ փաստական տվյալներ են ստացվել Գյումրու քաղաքապետ Վարդան Ղուկասյանի և գլխավոր ճարտարապետի կողմից կաշառք պահանջելու վերաբերյալ։ Տեսանյութում Վարդան Ղուկասյանի խոսակցությունն է այն մասին, որ գումարի դիմաց քայլեր չեն ձեռնարկվի՝ ինչ-որ շինության քանդման ուղղությամբ։
Հակակոռուպցիոն կոմիտեի հաղորդագրությունում նշված է․ «Ձեռնարկված միջոցառումների արդյունքում, մասնավորապես, պարզվել է, որ Գյումրի համայնքի ղեկավարը և գլխավոր ճարտարապետը, տեղեկանալով այն մասին, որ քաղաքացու կողմից Գյումրի համայնքի Գարեգին Նժդեհ փողոցի 1/9 հասցեում կառուցվել է շուրջ 1500 մ2 մակերեսով ինքնակամ շինություն, որը ենթակա է եղել քանդման, եկել են նախնական համաձայնության՝ քաղաքացու հետ մտնել «կոռուպցիոն» գործարքի մեջ՝ խոստանալով կառուցված ինքնակամ շինության քանդման ուղղությամբ միջոցներ չձեռնարկել, ավելին՝ կազմել շինությունն իբրև քանդված և նոր կառուցված լինելու վերաբերյալ պաշտոնական կեղծ փաստաթղթեր, օրինականացնել այն՝ դրա դիմաց պահանջելով խոշոր չափերով՝ չորս միլիոն ՀՀ դրամ գումարի կաշառք»։