«ՀՀ հակառուս և իշխանամետ շրջանակների համար կարևոր է Բայրամովի թեզերը «ջնջել հակառուսական» քարոզչությամբ». Արա Պողոսյան

Քաղաքագետ Արա Պողոսյանի ֆեյսբուքյան գրառումը. «Մի տեղեկատվական գրոհի մասին․
Ուրեմն՝ Բայրամովն իր հայտնի հարցազրույցում հստակ նշում է, որ 2023 թվականին Արցախում գտնվող Ռուսաստանի խաղաղապահ հրամանատարությունը տեղեկացվել է սպասվող գործողության մասին դրա մեկնարկից 10-15 րոպե առաջ։
2023 թվականի դեկտեմբերին Newsweek-ի հետ զրույցում էլ Հաջիևն էր նշել, որ սեպտեմբերի 19-ին՝ հարձակումից 10 րոպե առաջ, Մոսկվան և ռուս խաղաղապահները նախազգուշացվել են:
Երևանում էլ Արցախի Հանրապետության նախագահ Սամվել Շահրամանյանն էր պատմել, որ․ «Սեպտեմբերի 19-ի առավոտյան ես գտնվում էի ռուս խաղաղապահ զորակազմի հրամարատարի մոտ։ Առաջին ազդակը, որ հնարավոր է՝ սկսվի ռազմական գործողություն, եղել է այն, որ Շուշիի ներքևում գտնվող ադրբեջանական հենակետից մոտեցել են նույն վայրում գտնվող ռուսական հենակետին և զգուշացրել, որ թաքցնեն անձնակազմը, շուտով կաշխատի հրետանի։ Այդ փաստը մենք ներկայացրել ենք ռուս խաղաղապահներին, նրանք էլ էին տեղյակ դրա մասին և ճշտումներից հետո այդ փաստը հաստատվել է, և ինձ համար պարզ է դարձել, որ որոշ ժամանակ անց հնարավոր է, որ կսկսվեն ռազմական գործողություններ»։
Ի՞նչ է ստացվում՝ Հայաստանի հակառուս և իշխանամետ շրջանակները մոռանալով տեղեկությունների ամբողջ խրոնոլոգիան փնտրում է հակառուսական արշավ սկսելու առիթ, անկախ այն հանգամանաքից՝ նո՞ր տեղեկություն է, թե՞ տարիներով մաշված։ Նրանց համար կարևորը Բայրամովի մյուս թեզերը «ջրել հակառուսական» քարոզչությամբ։
Մեծ հաշվով իմ համար միևնույն է՝ հակառուսականություն կտարածեն, թե ոչ, թող դրա մասին մտածեն ռուսներն ու իրենց արբանյակները, բայց ինձ համար ցավալի է իմ ժողովրդի էմոցիաների վրա խաղալով օտար շահեր սպասարկելու այս արատավոր երևույթը։
Դուք մասնագետ չեք, դուք սովորական պորապագանդիստներ եք, որոնց արժեքը կորոշեն նրանք, ովքեր կվճարեն։
Ի դեպ՝ 2021 թվականին կուրծք էիք ծեծում «նոյեմբերի 9»-ի եռակողմ հայտարարության համար, իսկ հիմա՞՝ վաշինգտոնյան։ Այ դա՛ է ձեր սկզբունքն ու մասնագիտական անաչառությունը»: