«Ուշագրավ հանդիպում է կայացել Անթիլիասի Մայրավանքում»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Ուշագրավ հանդիպում է կայացել Անթիլիասի Մայրավանքում: Մեծի Տանն Կիլիկիո Կաթողիկոս Արամ Առաջին Վեհափառը հանդիպել է Տանն Կիլիկիո Կաթողիկե Հայոց Կաթողիկոս-Պատրիարք Ռաֆայել Պետրոս ԻԱ (21-րդ) Մինասյանի հետ, այլ կերպ ասած՝ հայ կաթոլիկների հոգևոր առաջնորդի հետ:

Նշեմ, որ Տանն Կիլիկիո Կաթողիկե եկեղեցին ևս գտնվում է Լիբանանում:

Այս հանդիպումը բնականաբար ուշագրավ է ինքնին, բայց առաջին հերթին նաև այն իրողությունների ֆոնին, որ առկա են Հայ Առաքելական եկեղեցու, մասնավորապես Մայր Աթոռի և Գարեգին Վեհափառի շուրջ:

Անթիլիասում տեղի ունեցած հանդիպման հանդեպ ուշադրություն գրավող մյուս էական հանգամանքը այն է, որ Տանն Կիլիկիո Կաթողիկե եկեղեցու Կաթողիկոս-Պատրիարքին կամ պարզապես հայ կաթոլիկների հոգեւոր առաջնորդին հոկտեմբեր ամսին Վատիկան այցի ընթացքում հանդիպել է Հայաստանի վարչապետ Նիկոլ Փաշինյանը:

Ի դեպ, ավելորդ դետալ չէ եւ այն, որ Փաշինյանը հոկտեմբերի 18-20-ին Վատիկան մեկնելուց առաջ Երեւանում ընդունել էր Արամ Առաջինի բանագնացին:

Անթիլիասը հայտնում է, որ Արամ Առաջինն ու Ռաֆայել Պետրոս ԻԱ-ն քննարկել են այսպես ասած ազգային միասնության հարցեր: Սակայն կարծում եմ, որ այդ հաղորդագրային շաբլոնը այդքան էլ չի արտահայտում հանդիպման իրական բովանդակությունը կամ մոտիվները: Ունեմ վստահություն, որ Մայր Աթոռի շուրջ իրավիճակը դրանցում ունի առանցքային տեղ: Հարցն այն է, թե ինչ շեշտադրումներով:

Այդ կապակցությամբ ես իմ գնահատականը արտահայտել եմ տարբեր առիթներով: Ես կարծում եմ, այդուհանդերձ, որ բարձրագոչ ձևակերպումների ներքո, գործնականում վարքագծային շարժիչը այդ հարցում՝ «մրցակցությունն» է»։