«Չհասկացա՞ր, որ Պատարագի գնալը միտինգ չէ»․ Էդուարդ Շարմազանով

ՀՀԿ Գործադիր մարմնի անդամ Էդուարդ Շարմազանովի ֆեյսբուքյան գրառումը. «Հայոց Եկեղեցին ու Հայրապետը խոնարհվում են ոչ թե «կեսարների», այլ միայն Աստծո առաջ։
Նիկոլ Փաշինյան, բա ասում էիր, որ չես հայտարարի պատարագ գնալուդ վայրը։ Հիմա ի՞նչ փոխվեց։
Ինչո՞ւ ես նախապես հայտարարում վաղը Մասիսում պատարագի մասնակցելու մասին։
9-11 են զանգե՞լ ու կանչել քե՞զ ։
Դու էլ քո հերթին երևի համար 1 ես տվել մարզի համայնքապետերին, քպ-ի ակտվին, որ գան վաղը Մասիսում պատարագի մասնակցեն։
Բա Տիրոջից ես խոսում, Սաղմոսներ ես արտասանում , չհասկացա՞ր, որ հրամանով պատարագի չեն գնում։
Պատարագի գնալը միտինգ չէ։
Անթույլատրելի է Եկեղեցին դարձնել կուսակցական քարոզչական հրապարակ։
Ցավն այն է, որ այդ ամենը շատ լավ գիտակցելով ես անում։
Եկեղեցին ներսից պառակտեցիր, հիմա անցել ես հակաթոռ կաթողիկոսություն ստեղծելո՞ւն…
Ո՛չ առաջինն ես, ո՛չ էլ՝ վերջինը…
5-րդ դարում Սասանյան Պերոզ արքան նույնիսկ աքսորում է Գյուտ կաթողիկոսին, բայց ստիպված ազատ է արձակում և թույլ տալիս Գյուտ Ա Արահեզացուն վերադառնալ Հայաստան։
Իսկ Բյուզանդիայի Մորիկ կայսրը 591 -ին Ավանում ստեղծում է հակաթոռ կաթողիկոսություն՝ ի հակակշիռ Դվինի Հայոց հայրապետական աթոռի։ Բայց այն ընդամենը մի քանի տարվա կյանք է ունենում և արդեն 607 թ. Հայոց կաթողիկոս Աբրահամ Ա Աղբաթանեցու հրավիրած եկեղեցական ժողովին մասնակցել է Ավանի վանքի երեց Հունանեսը։
Ասածս ի՞նչ է. Պերոզն ու Մորիկն էլ ունեին Հայ Եկեղեցին հնազանդեցնելու ծրագրեր. նրանք ժամանակավորապես հաջողեցին, բայց քիչ անց նահանջեցին ու պարտվեցին։
Գիտե՞ս ինչու…
Քանի որ չհասկացան, որ Հայոց Հայրապետն ու Եկեղեցին խոնարհվում ու հնազանդվում են ոչ թե «կեսարների», այլ միայն Աստծո առաջ»։