Թուրքիայի ատոմակայանից Ռուսաստանի շահույթը կկազմի 180 միլիարդ դոլար

1196

Երկուշաբթի, 26 հունվարի, 2026 թ., 21:18

Թուրքիայի գլխավոր ընդդիմադիր ուժ համարվող քեմալականների «Ժողովրդահանրապետական» կուսակցության (ԺՀԿ-CHP) փոխնախագահ, պատգամավոր Դենիզ Յավուզյըլմազը հայտարարել է, որ «Աքքույու» ատոմակայանի նախագծից Ռուսաստանի զուտ շահույթը կազմելու է միլիարդավոր դոլարներ։

Ընդդիմադիր պատգամավորի հրապարակած հաշվարկների համաձայն՝ նախագծի ընդհանուր ծախսը գնահատվում է շուրջ 27.3 մլրդ դոլար, մինչդեռ շահագործման ամբողջ ընթացքում Ռուսաստանի եկամուտը հասնելու է ավելի քան 207 մլրդ դոլարի, ինչի արդյունքում մաքուր շահույթը կազմելու է ավելի քան 180 մլրդ դոլար։

Նա նաև նշել է, որ այդ շահույթը ներկայիս փոխարժեքով համարժեք է մոտ 7,7 տրիլիոն թուրքական լիրայի, և քննադատել է կառավարությանը՝ նախագիծը տեղական ու ազգային ներկայացնելու համար՝ ընդգծելով, որ տնտեսական բեռը հիմնականում ընկնում է Թուրքիայի վրա։

«Էրմենիհաբեր»-ը նաև հիշեցնում է, որ Մերսին նահանգում «Աքքույու» ատոմակայանը Թուրքիայի «Միջուկային կարգավորման կազմակերպության» (NDK) թույլտվությամբ կառուցվում է «Росатом»-ի և թուրքական «Akkuyu Nükleer» ՓԲԸ-ի կողմից: