Հայաստանում ԵՄ առաքելությունը նոր ղեկավար ունի

Եվրոպական միության խորհուրդը Սատու Կոյվուին նշանակել է Հայաստանում Եվրոպական միության դիտորդական առաքելության ղեկավար։ Նա իր պարտականությունները կստանձնի 2026 թվականի փետրվարի 20-ին՝ փոխարինելով Մարկուս Ռիտերին։

Սատու Կոյվուն ֆինն ավագ ոստիկան է՝ ավելի քան 35 տարվա ազգային և միջազգային փորձով։ Նշանակվելուց առաջ նա աշխատում էր Ֆինլանդիայի Ազգային ոստիկանության վարչությունում՝ որպես մարդկային ռեսուրսների ղեկավար:

Նրան Հայաստանում ԵՄ դիտորդական առաքելության նոր ղեկավար նշանակելու որոշումը կայացվել է ԵՄ-ի Քաղաքական և անվտանգության կոմիտեի կողմից՝ 2026 թվականի փետրվարի 17-ին։

Հիշեցնենք՝ առաքելության խնդիրն է դիտարկել և զեկուցել տեղում իրավիճակի մասին՝ Հայաստանի և Ադրբեջանի սահմանագծի հայկական կողմում։ Առաքելության մանդատը գործում է մինչև 2027 թվականի փետրվարի 19-ը։

Այն բաղկացած է ավելի քան 200 միջազգային և տեղական աշխատակիցներից։ Առաքելության դիտորդներն ու քաղաքացիական փորձագետները ներկայացնում են ԵՄ անդամ 25 պետություն և մեկ երրորդ ներդրող պետություն՝ Կանադան։