«Բրիտանիան և Հվ Կորեան սրբում-տանում են ճանապարհից այն աղբն` ինչը ոմանք սիրով ուտում են». Հայկ Մարտիրոսյան
66
Այսօր, 03:06
Քաղաքագետ Հայկ Մարտիրոսյանի ֆեյսբուքյան գրառումը․ «Այսօր առավոտյան Սանդրինգհամում՝ Անգլիա, ձերբակալվել է Էնդրյու Մաունթբաթթեն-Ուինձորը, թագավոր Չարլզի հարազատ եղբայրը, թագուհի Էլիզաբեթ II-ի որդին՝ Բրիտանիայի նախկին առևտրական ներկայացուցիչ ու արդեն նախկին Արքայազն Էնդրյուն: Արքայազնի խնդիրները սկսեցին այն բանից հետո, երբ ավստրալուհի Վիրջինիա Ջյուֆրեն մեղադրեց նրան իրեն բռնաբարելու մեջ, իսկ հետո՝ շատ արագ հրապարակվեցին Էպստինի հետ նրա շարունակական ընկերության մասին տվյալներ: ԱՄՆ Արդարադատության նախարարության կողմից Էպստինի գաղտնի, մասնավոր ֆայլերի հրապարակումից հետո հայտնի դարձավ, որ Էնդրյուն այլ դեռատի կանանց հետ նույնպես կապեր է ունեցել Էպստինի դղյակներում: Բայց ամենամեծ օրինազանցություն համարվեց այն, որ Բրիտանիայի առևտրական ներկայացուցիչ արքայազնը, ինչպես պարզվեց, գաղտնի առևտրային տեղեկատվություն էր փոխանցել ֆինանսիստ Էպստինին: (Ի դեպ՝ միայն ռսական ռեսուրսներից սնվող հայրենակիցներ. Էպշտեյնը ձեր տերերի լեզվով է ԷպՇՏԵՅն: Անգլերենում հնչում և արտաբերվում է ոչ թե գերմանական հնչողությամբ՝ այլ անգլիական՝ ԷպսՏԻՆ): Բրիտանական պետությունը չի կարող ներել անգամ իր պետության գլխի հարազատ եղբորը, երբ նա պետական իր դիրքը կիրառում է հանուն մասնավոր՝ անձնական օգուտի: Եվ Էնդրյույի անկումն այսօր նոր հատակի հասավ: Թագավորական ընտանիքի ամենաբարձրադիր անդամի ձերբակալության: Թագավոր Չարլզը (Կառլը գերմանախոս ռուսների հորինվածքն է) հայտարարել է, որ սատարում է հարազատ եղբոր ձերբակակության փաստը: Այսօր Ասիայում մեկ այլ համանման իրադարձություն է տեղի ունեցել: Հարավային Կորեայի վերջին նախագահ Յուն Սուկ Յոլն այսօր դատապարտվել է ցմահ բանտարկության, թեև դատախազն ավելին՝ մահապատիժ էր պահանջել: Յունը մեղավոր է ճանաչվել ժողովրդի դեմ դավադրություն կազմակերպելու մեջ, որովհետև քաղաքական նպատակներից ելնելով՝ արտակարգ դրություն էր հայտարարել ընդամենը մի քանի ժամով երկրում և զինվորներ էր ուղարկել՝ շրջափակելու խորհրդարանը: Խորհրդարանը նրան արագ իմփիչ էր արել և նախագահը մեկ օրում դարձել էր պարզապես Յուն: Բրիտանիան և Հարավային Կորեան ոչ միայն ժողովրդավարություններ են, այլև բարձր գիտակցություն ունեցող ժողովուրդներ ունեցող երկրներ են: Այդտեղ ժողովրդին հաշվետու է իշխանությունը և երբ փորձում է անտեսել ժողովրդին՝ անմիջապես ծանրագույն պատասխանատվության է կանչվում: Ժողովուրդը բուլդոզում է բոլոր այն կառավարիչներին, որոնք անարգում են իրեն, օգտագործում իրեն կամ պարզապես իրենց ճիշտ չեն պահում ժամանակավոր և անգամ ինչպես Էնդրյուի պարագայում՝ իրենց մշտական պաշտոններում: Դրանք բադրիջանային հանրապետություններ չեն, որտեղ իշխանությունը թքած ունի ժողովրդի վրա ու ոչնչացնում է ժողովրդին ու նրա բնօրրանը, իսկ ժողովուրդը չի համագործակցում իրեն ջնջող իշխանության հետ ու չի քաջալերում նրան: Դա իրականություն է, որ դիստոպիական նովելներում էին միայն հանդիպում: Մեծախոս, մեծաբերան, արտաքուստ իբր հերոսական, բայց խորքում ողորմելի պատմությամբ հպարտացող չեն ո՛չ բրիտանացիները և ո՛չ կորեացիները: Նրանց պատմությունները կամքի, դիմադրության և պայքարի մասին են: Դրանք արժանապատիվ ժողովուրդներ են: Նրանք չեն մտածում, թե իրենք ոչինչ անել չեն կարող ու տարված չեն լափամոլությամբ ու հեշտասիրությամբ: Դրանք պետականակերտ, հաշվեպահանջ և իրենց երկրին ու սեփական ճակատագրին տեր ժողովուրդներ են, որոնք սրբում-տանում են ճանապարհից այն ամեն աղբն՝ ինչ ոմանք սիրով ուտում են, իսկ իրենք՝ նետում աղբանոց: Բրիտանիայում դեռ նոր զարգացումներ կլինեն: Եվ անգամ թագավորի եղբորը վարչաքրեական իրավախախտումը չի ներվելու»:
