«Ինչո՞ւ հենց այս պահին որոշվեց բարձրացնել կենսաթոշակները»․ լրագրողը՝ Արսեն Թորոսյանին

«Ինչո՞ւ հենց այս պահին որոշվեց բարձրացնել կենսաթոշակները»,- ճեպազրույցի ժամանակ լրագրողը հարց ուղղեց Աշխատանքի և սոցիալական հարցերի նախարար Արսեն Թորոսյանին։

«Կառավարությունն ունի 2021-26թթ․ ծրագիր, որն իրագործում է։ Կառավարությունը գործում է մինչև նոր կառավարության ձևավորումը և ցանկացած գորոծողություն, որն իրականացնում է կառավարությունը, ըստ էության, լեգիտիմ է և տեղավորվում է այդ ծրագրի շրջանակներում կամ բխում է ծրագրից»,- պատասխանեց Թորոսյանը։ «Մենք կենսաթոշակները և նպաստները մինչ այդ բարձրացրել ենք այլ եղանակներով։ Բայց կան օբյեկտիվ հանգամանքներ, որոնք նոր են ի հայտ եկել․ դա 2025թ․ մեր տնտեսական աճի ցուցանիշն է, որը մեզ հիմք է տալիս այլ հետևություններ անել՝ հարկաբյուջետային քաղաքականության, նաև որոշումներ կայացնել, որոնք մինչև դա ավելի ռիսկային էին թվում, և դրանով պայմանավորված որոշում է կայացվել բարձրացնել կենսաթոշակները։ Բյուջետային ծախսերը, որոնք պետք կգան այս տարի այդ ծախսը հոգալու համար կլինեն մոտ 80 միլիարդ դրամի շրջանակներում, որը մենք ունենք, ըստ էության, և վերաբաշխումների միջոցով կտեղափոխենք նախարարության բյուջե»,- մանրամասնեց նախարարը։