«Հունվարյան անկարգությունների ժամանակ զոհվել է մոտ 400 զինծառայող»․ Փեզեշքիան

Իրանի նախագահ Մասուդ Փեզեշքիանը հայտարարել է, որ հունվարյան անկարգությունների ժամանակ զոհվել է մոտ 400 զինծառայող։ Նա նաև հերքել է ԱՄՆ նախագահ Դոնալդ Թրամփի պնդումը, թե զոհվել է 32000 ցուցարար։

«Ասում են, որ Իրանը չարիքի և ահաբեկչության օջախ է։ Արդյոք մենք ահաբեկիչներ ենք։ Արդյոք մենք սպանում ենք մարդկանց: Երեկ ԱՄՆ նախագահը հայտարարել է, թե Իրանը կազմակերպել է 32 հազար մարդու զանգվածային սպանություն։ Մենք զանգվածային սպանություններ ենք կազմակերպե՞լ։ Մենք ներկայացրել ենք վիճակագրությունը և նույնիսկ նրանց անձնագրերի համարները, ում մասին խոսել ենք: Ով պնդում է, որ թվերն ավելի շատ են, թող ապացուցի։ Բացի այդ, հայտարարված տվյալներից ավելի քան 2000 մարդ անմեղ զոհեր են, 300-400-ը՝ զինծառայողներ, որոնք պաշտպանել են իրավակարգը», - ասել է նա։

Հունվարի վերջին Իրանի ԱԳՆ նախարար Աբբաս Արաղչին հայտարարել է, որ Իսլամական Հանրապետությունում տեղի ունեցած անկարգությունների հետևանքով զոհվել է 3117 մարդ։