«Դուք մի հատ Կալիգուլայի ձիու կարգավիճակից դուրս եկեք, նոր խոսեք ուրիշների մասին»․ Արման Աբովյան

ԱԺ նախկին պատգամավոր Արման Աբովյանի ֆեյսբուքյան գրառումը․ «Այսօր ՔՊ խմբակցության ղեկավար Հայկ Կոնջորյանը ԱԺ նիստը նախագահող մեկ այլ ՔՊ-ականի հետ «Տրոյական ձիու» ու «Նոյյան տապանի» մոտիվներով մտավարժանքներ էին անում։
Դե ո՞նց չասես. դուք մի հատ Կալիգուլայի ձիու կարգավիճակից դուրս եկեք, նոր խոսեք։ Ինքնուրույն տեսակետ, ինքնուրույն միտք, ինքնուրույն գոնե մեկ անգամ քվեարկելու իրավունք ձեռք բերեք, հետո նոր ուրիշների մասին խոսեք։ Դուք սկի ինքնուրույն քավոր չեք կարում պահեք։ Ձեզ համար նույնիսկ պատարագ ու քահանա են ընտրում ու ուղղորդում, թե որ եկեղեցին գնաք կամ չգնաք, դուք խոսելու իրավունք ունե՞ք։
Հա, ի դեպ, Կալիգուլայի ձին՝ Ինցիտատը, նա էլ սկզբում սենատոր էր (գրեթե ԱԺ պատգամավոր), հետո տերը միտք ուներ նրան կոնսուլ սարքելու, էն էլ չհասցրեց»։

Նշենք, որ այսօր ԱԺ նիստում ՔՊ խմբակցության ղեկավար Հայկ Կոնջորյանը՝ անդրադառնալով ապօրինի գույքի բռնագանձման գործընթացներին և ընդդիմադիր գործիչների ունեցվածքին՝ նշել է․ «ԲՀԿ-ի և Գագիկ Ծառուկյանի մասին․ ես ոնց հասկանում եմ՝ էս «Նոյյան տապանն» էլ է ապօրինի գույքով անցնելու․․․ Ի դեպ, ինձ թվում է՝ Գագիկ Ծառուկյանին ասել են, որ ինքը տրոյական ձի սարքի, ինքը որոշել է Նոյյան տապան սարքի։ Խառնել է։ Չնայած նպատակը հասկանալի է, որ պիտի տրոյական ձի լինի՝ հաշվի առնելով անձնակազմը, որ էնտեղ է գնում... Դա ոչ թե Նոյյան տապան է, այլ տրոյական ձի, ու վերջում իրոք պարզվելու է, որ էդ Նոյյան տապանը ապօրինի գույքով անցնում է»։