«Եթե ԱՄՆ-ն չի կարողանում պաշտպանել սեփական ռազմաբազաները, ինչպե՞ս էր պաշտպանելու Հայաստանին»․ Արթուր Խաչիկյան

Քաղաքագիտության դոկտոր Արթուր Խաչիկյանի ֆեյսբուքյան գրառումը․ «Հիշո՞ւմ եք, թե ինչպես էր քարոզիչների այս թիմը մեզ հավաստիացնում, որ Թրամփը կպաշտպանի մեզ, կապահովի մեր անվտանգությունը, քանի որ մենք ունենք նրա WhatsApp-ի համարը։ Պարսից ծոցում ամերիկյան ռազմաբազաները ենթարկվում են Իրանի հարձակումներին։ ԱՄՆ-ն ռազմաբազաներ ունի իր դաշնակիցների տարածքում՝ Բահրեյնում, Քուվեյթում, Կատարում, Սաուդյան Արաբիայում, ԱՄԷ-ում և Օմանում։ Էլ չենք խոսում ողջ տարածաշրջանով մեկ սփռված հյուպատոսությունների և դեսպանատների մասին։
Իսկ հիմա նայե՛ք տարածաշրջանի ամերիկյան բազաներին Իրանի հասցրած օդային հարվածների քարտեզին։ Եվ պատասխանե՛ք հարցին. եթե ԱՄՆ-ն չի կարողանում պաշտպանել սեփական ռազմաբազաներն ու իր պաշտոնական ռազմավարական դաշնակիցներին տարածաշրջանում, ապա ինչպե՞ս էր ԱՄՆ-ն պաշտպանելու Հայաստանին, որի հետ դաշնակցային պայմանագիր չունի, և որտեղ չկան ամերիկյան բազաներ։ Հը՞։
Եվ երկրորդ հարցը. եթե այս խմբակին հաջողվեր ամերիկյան օբյեկտներ կառուցել Զանգեզուրի միջանցքի տարածքում՝ հենց Իրանի սահմանին, որքա՞ն ժամանակ կանցներ, մինչև Իրանը հարվածեր մեր տարածքում գտնվող այդ օբյեկտներին։ Իսկ Թուրքիան ու Ադրբեջանը չէի՞ն ներքաշվի պատերազմի մեջ՝ պաշտպանելու իրենց Զանգեզուրի միջանցքը։ Արդյոք մեր տարածքում պատերազմ չէ՞ր սկսվի, և արդյոք այն չէ՞ր ավարտվի Հայաստանի՝ անվտանգության գոտիների բաժանմամբ, ինչպես դա եղավ Սիրիայում և Լիբանանում։
Կարկանդակ ու եգիպտացորեն ուտելը, իհարկե, շատ հոյակապ է։ Բայց հնարավո՞ր է արդյոք ծամել ու միաժամանակ մտածել»։