«Սամվել Կարապետյանի անունը չէր կարող լինել ցուցակում․ չի համապատասխանում ցենզերին»․ Գոհար Մելոյան

«Ուժեղ Հայաստան» դաշինքի արտահերթ համագումարից հետո լրագրողների հետ զրույցում սահմանադրագետ, կուսակցության անդամ Գոհար Մելոյանը նշեց, որ դաշինքի անվանումից Սամվել Կարապետյանի անունը հանվել է ԱԺ–ի ընդունած օրենսդրական փոփոխությունների արդյունքում։

Պարզաբանելով, թե ինչու Սամվել Կարապետյանի անունը ընտրացուցակում չկա, Մելոյանը նշեց․ «Սամվել Կարապետյանի անունը չէր կարող լինել ցուցակում, քանի որ այս պահի դրությամբ նա չի համապատասխանում վարչապետի համար ներկայացված ցենզերին»։

Անդրադառնալով հարցին, թե այդ դեպքում ինչո՞ւ են նշում՝ հաջորդ վարչապետը Սամվել Կարապետյանն է լինելու, Մելոյանը պատասխանեց․ «Եթե մարդիկ ուզում են, որ Հայաստանի հաջորդ վարչապետը Սամվել Կարապետյանը հանդիսանա, մեզ տալու են իրենց վստահության քվեն, մենք սահմանադրական փոփոխության նախագիծ ենք բերելու»։