Բյուրեղավանում մեկ օրում գրանցվել է մոտ 30 կանչ․ 8 հոգի հոսպիտալացվել է

1583

Չորեքշաբթի, 22 ապրիլի, 2026 թ., 17:24

Ինչպես ավելի վաղ հայտնել էինք, Բյուրեղավանում վերջին օրերին բազմաթիվ քաղաքացիներ դիմել են շտապօգնության ծառայություն՝ սրտխառնոց, փորլուծություն, փսխում, ջերմության բարձրացում գանգատներով։

Իրավիճակի վերաբերյալ պարզաբանում է տարածել Բյուրեղավանի համայնքապետարանը և քաղաքային պոլիկլինիկայի տնօրենի պաշտոնակատար Արմեն Վարդումյանը։

«Երեկ երեկոյան՝ ժամը 7-8-ից սկսած, եղել են շտապօգնության բազմաթիվ կանչեր: Գանգատները նույնը՝ փսխում, սրտխառնոց, ջերմություն, որոնք երբեմն ուղեկցվել են լուծով: Ուշ երեկոյան նույն սիմպտոմատիկայով կանչերի թիվը շատացել է՝ ունեցել ենք մոտ 30 կանչ, իրավիճակի մասին հայտնել ենք Հիվանդությունների վերահսկման և կանխարգելման ազգային կենտրոն: Ամբողջ գիշեր շարունակվել են կանչերը:

Բոլոր կազմակերպությունները տեղեկացված են՝ «Վեոլիա ջուր», Արտակարգ իրավիճակների վարչություն։ ՀՎԿԱԿ-ի ծառայությունն առավոտից այստեղ է եղել, տարբեր հասցեներում ջրից նմուշառումներ են արվել․ սպասում ենք պատասխանի:

Նույն գանգատներով դիմելիությունը պոլիկլինիկա շարունակվում է, կան նաև հոսպիտալացվածներ։

Մենք մեր պարտքը համարեցինք բնակչությանը տեղյակ պահել, որ այսպիսի խնդիր կա: Խորհուրդ ենք տվել ջրից կա՛մ չօգտվել, կա՛մ օգտագործել եռացրած»,- հրապարակած տեսանյությում մանրամասնում է Բյուրեղավանի պոլիկլինիկայի տնօրենի պաշտոնակատար Արմեն Վարդումյանը: