ԱՄՆ-ի հետ բանակցությունները դադարեցվել են Լիբանանում իրավիճակի սրման պատճառով

Իրանը հայտարարել է, որ ԱՄՆ-ի հետ բանակցությունները ձգձգվում են Վաշինգտոնի հաճախակի փոփոխվող դիրքորոշման պատճառով։
ԱՄՆ-ի և Իրանի միջև բանակցությունները հետաձգվել են Վաշինգթոնի հարափոփոխվող դիրքորոշման և նոր պահանջների պատճառով, երկուշաբթի օրը հայտարարել է Իրանի արտաքին գործերի նախարարության խոսնակ Էսմայիլ Բաղային։ Նա նշել է, որ ամերիկյան կողմը անընդհատ փոխում է իր դիրքորոշումը, առաջ է քաշում նոր կամ հակասական պահանջներ և լրատվամիջոցներին ուղարկում հակասական հաղորդագրություններ, ինչը ստեղծում է անվստահության մթնոլորտ, որը խոչընդոտում է բանակցային գործընթացը։

Բաղային ընդգծել է, որ բանակցությունները տեղի են ունենում փոխադարձ անվստահության մթնոլորտում, ինչը ավելի է բարդացնում համաձայնության հասնելը։ Ավելի վաղ ամերիկյան լրատվամիջոցները հայտնել էին, որ ԱՄՆ-ի նախագահ Դոնալդ Թրամփն անցյալ շաբաթվա վերջին կոշտացրել է Իրանի նկատմամբ իր բանակցային դիրքորոշումը՝ ներկայացնելով Թեհրանի վրա ճնշում գործադրելու և բանակցային գործընթացը արագացնելու նպատակով համաձայնագրի նոր, ավելի կոշտ պայմաններ։

Լրատվամիջոցները նաև հայտնել են, որ երկու կողմերն էլ համաձայնության են եկել փոխըմբռնման հուշագրի նախագծի շուրջ, սակայն բանակցությունները, ի վերջո, կասեցվել են։ Tasnim լրատվական գործակալությունը հայտնել է, որ ԱՄՆ-ի հետ բանակցությունները դադարեցվել են Լիբանանում իրավիճակի սրման ֆոնին, որը հրադադարի նախապայմաններից մեկն էր։

Իրանը նաև հայտարարել է Հորմուզի նեղուցը փակելու և տարածաշրջանում, այդ թվում՝ Բաբ էլ-Մանդեբի նեղուցում, իր գործունեությունը ընդլայնելու պատրաստակամության մասին: Հաղորդվել է նաև, որ Իսրայելի պաշտպանության բանակը կտրուկ ակտիվացրել է ռազմական գործողությունները Լիբանանում՝ զգալիորեն ազդելով տարածաշրջանային կայունության և բանակցային գործընթացի վրա։

Երկու շաբաթ առաջ երկրները համաձայնության էին եկել ապրիլի 16-ին սկսված հրադադարը 45 օրով երկարաձգելու հարցում: Սակայն հետագա զարգացումները բարդացրել են երկարաժամկետ համաձայնության հասնելու հնարավորությունը: