«Ընտրություններում որոշվելու է մեր ազգային ինքնության պահպանման հարցը». Մհեր Մելքոնյան

ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը. «Պատմության մեջ լինում են ժամանակաշրջաններ, երբ ընտրությունները պարզապես իշխանության ձևավորման մեխանիզմ չեն լինում։ Դրանք վերածվում են ազգային ինքնության, պետական կամքի և ժողովրդի ապագայի վերաբերյալ հանրաքվեի։
Հայաստանն այսօր ապրում է հենց այդպիսի պատմական ժամանակաշրջան։
Մեր պետությունը կանգնած է անվտանգային, քաղաքական, ժողովրդագրական և արժեքային լրջագույն մարտահրավերների առջև։ Վտանգված են ոչ միայն մեր սահմանները, այլև հանրային համերաշխությունը, ազգային արժեհամակարգը, պետական ինստիտուտների նկատմամբ վստահությունը և վաղվա օրվա նկատմամբ ժողովրդի հավատը։ Այս պայմաններում յուրաքանչյուր քաղաքացու քվե ստանում է առանձնահատուկ նշանակություն, քանի որ խոսքը վերաբերում է ոչ թե առանձին քաղաքական ուժերի հաջողությանը կամ անհաջողությանը, այլ Հայաստանի Հանրապետության հետագա գոյության և զարգացման ուղուն։
Այս ընտրություններում որոշվելու է մեր ազգային ինքնության պահպանման հարցը, մեր պետականության ամրապնդման հարցը, մեր մշակույթի, մեր հոգևոր արժեքների, մեր բանակի և մեր ազգային անվտանգության ապագան։ Որոշվելու է, թե ինչպիսի Հայաստան ենք ցանկանում թողնել հաջորդ սերունդներին՝ արժանապատիվ և ինքնիշխան, թե՞ մշտական անորոշությունների և ցնցումների մեջ հայտնված պետություն։
Հետևաբար յուրաքանչյուր Հայաստանի Հանրապետության քաղաքացի պարտավոր է գիտակցել իր պատմական պատասխանատվությունը։ Մասնակցել ընտրություններին նշանակում է մասնակցել Հայրենիքի ապագայի կերտմանը։ Մասնակցել ընտրություններին նշանակում է տեր կանգնել մեր պետականությանը, մեր ազգային արժեքներին, մեր մշակույթին, մեր լեզվին, մեր Սուրբ եկեղեցուն, մեր բանակին և մեր ազգային արժանապատվությանը։
Պատմական պահերին ժողովուրդները կամ դառնում են իրենց ճակատագրի կերտողները, կամ վերածվում են ուրիշների կայացրած որոշումների հետևանքները կրողները:
Հայաստանի Հանրապետության ապագան որոշվելու է մեր քաղաքացիների կամքով։ Եվ այդ կամքը պետք է լինի հստակ, արժանապատիվ, ազգային և պետականամետ՝ հանուն ուժեղ, անվտանգ, ինքնիշխան և հայեցի Հայաստանի Հանրապետության»: