«Արթուր Օսիպյանը պահվում է անմարդկային պայմաններում, դուք եղե՞լ եք այնտեղ»․ լրագրողը՝ Սրբուհի Գալյանին

«Արդեն 24 օր հացադուլ իրականացնող Արթուր Օսիպյանը պահվում է անմարդկային պայմաններում, խուցը, որտեղ գտնվում է, անմխիթար վիճակում է՝ բորբոսնած, խոնավ պատեր։ Դուք եղե՞լ եք այնտեղ, այցելե՞լ եք նրան»,- ճեպազրույցի ժամանակ լրագրողը դիմեց Արդարադատության նախարար Սրբուհի Գալյանին։ «Մեր ՔԿՀ-ների պայմաններն այնպիսին են, ինչպիսին կան, բայց մենք շարունակաբար դրանք բարելավում ենք։ Արթուր Օսիպյանի առողջական վիճակը գնահատվում է կայուն, ամեն օր օպերատիվ կարգով տեղեկություններ եմ ստանում նրա առողջական վիճակի մասին, երեկ նրան այցելել է մեր աշխատակիցը, նաև նրան առաջարկվել է հաղորդում ներկայացնել հանցագործության մասին այն իրողությունների հետ կապված, որոնք իր կարծիքով իրենց բնույթով հանցավոր են։ Մենք ամեն ինչ անում ենք, որ անձի բոլոր իրավունքները՝ այդ թվում հացադուլի, պատշաճ ապահովվի»,- ի պատասխան ասաց Գալյանը և հավելեց, որ չի այցելել Օսիպյանին։