«Ռուսական պատժամիջոցները շատ ցավոտ անդրադարձ են թողնելու մեր տնտեսության համար». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Հայ արտադրողներն ու արտահանողները, իսկ դա նշանակում է նաև՝ մեր պետությունը, նոր շուկաներ գտնելու հարցում բարդագույն ընտրության առաջ են կանգնել:
Ռուսաստանը պարբերաբար նոր արգելքներ ու պատժամիջոցներ է կիրառում, այսպիսով Հայաստանի իշխանություններին փորձելով պարտադրել ինքնակամ լքել ԵԱՏՄ-ն:
Ընտրություններից առաջ իշխանամետ փորձագետները և ինֆլուենսերները գրում էին, որ ընտրություններից հետո ռուսները վերադառնալու են նորմալ օրակարգի:
Ես, օրինակ, անձամբ մտածում էի և գրել եմ, անգամ վերնագրերով, որ կինոն սկսվելու ընտրություններից հետո: Այս կինոյում մեզ համար happy end չի լինելու:
Ռուսական պատժամիջոցները շատ ցավոտ անդրադարձ են թողնելու մեր տնտեսության համար, քանի որ կախվածությունը չափազանց մեծ է եղել:
Այսօր նույն իշխանական պրոպագանդան գուժում է Ռուսաստանի մոտալուտ կործանումն և ավետում, որ մեր երկիրը կարող է դիվերսիֆիկացնել իր տնտեսությունն ու առևտուրը, ինչպես հաջողությամբ արել է բանակի վերազինման հարցում:
Ռուսաստանի կործանումը եկեք թողնենք մի կողմ, քանի որ Ռուսաստանը կործանվում է առնվազն 300 տարի: Մի կողմ թողնենք նաև, թե այդ կործանումից Հայաստանի օգուտը որն է լինելու:
Մեր ժողովրդին պետք է շատ պարզ բացատրել, որ մի բան է ներմուծման դիվերսիֆիկացիան, բոլորովին այլ բան՝ արտահանման դիվերսիֆիկացիան բոլորովին այլ բան:
Օրինակ, եթե, Ռուսաստանը, ինչպես սպառնացել է, գազի գինը եռապատկի, մենք հավանաբար կարող ենք այլ տեղից գազ գնել, գուցե ավելի բարձր գնով, բայց հաստատ կարող ենք գնել:
Եթե Ռուսաստանը մեզ հաց չվաճառի, հաստատ հաց կարող ենք գնել այլ երկրից, սոված չենք մնա:
Բոլորովին այլ է արտահանումը:
Եթե մենք կորցնում ենք ռուսական շուկան մեր ձկնեղենի, մեր ծիրանի ու հանքային ջրերի համար, ապա տարիներ են պահանջվելու, մինչև գտնենք նոր շուկաներ և այդ ընթացքում կարող են մեր բիզնեսները ուղղակի մահանալ:
Այդ բիզնեսները, լավ թե վատ, ստեղծվել են հայ մարդու տքնաջան աշխատանքի շնորհիվ, այդ բիզնեսներն են ապահովում մեր պետական բյուջեն, մեր երկրի բարեկեցությունը»: