«Հանրաքվեն կնշանակի, որ քաղաքացիները պետք է պատասխանեն մի հարցի, որն այս պահին գոյություն չունի»․ Նիկոլ Փաշինյան

Նույնիսկ եթե ապագայում Հայաստանը բավարար չափով պատրաստ լինի Եվրոմիությանն անդամակցելուն, դա չի նշանակի, որ մեր երկիրն ինքնաբերաբար կդառնա ԵՄ անդամ։ Այս մասին հայտարարել է վարչապետ Նիկոլ Փաշինյանը՝ Ղրղզստանում ընթացող Եվրասիական միջկառավարական խորհրդի ընդլայնված կազմով նիստին։

«Դրա համար անհրաժեշտ կլինի Եվրոմիության անդամ պետությունների համաձայնությունը և Հայաստանի քաղաքացիների հավանությունը։ Մյուս կողմից, ակնհայտ է, որ առանց նախնական ինստիտուցիոնալ նախապատրաստական աշխատանքների, հնարավոր չէ այդ հարցը դնել Հայաստանի քաղաքացիների որոշմանը։

Նույնիսկ դրանից հետո անհրաժեշտ կլինի Եվրոմիությանը ներկայացնել անդամակցության պաշտոնական հայտ։ Իսկ դրանից հետո Հայաստանը պետք է ստանա Եվրոմիությանն անդամակցելու թեկնածու երկրի կարգավիճակ։

Առանց թվարկված փուլերի առնվազն մեծ մասն անցնելու՝ նշված հարցի շուրջ հանրաքվեի անցկացումը կլինի անբովանդակ և կնշանակի, որ մենք մեր քաղաքացիներից ակնկալում ենք մի հարցի պատասխան, որն այս պահին պարզապես գոյություն չունի: Կնշանակի, որ մենք ակնկալում ենք, որ Հայաստանի քաղաքացիները ընտրություն կատարեն երկու այլընտրանքների միջև, որոնցից մեկը գոյություն չունի: Դա կլինի անհարգալից վերաբերմունք մեր ժողովրդի նկատմամբ և գործնականում՝ ոչ լեգիտիմ»։