«Եթե սկզբունքները չեն գործում, նշանակում է՝ ԵԱՏՄ-ն չի գործում»․ Նիկոլ Փաշինյան

Առանց ԵԱՏՄ հիմնարար սկզբունքների իրականացման հնարավորության՝ ԵԱՏՄ-ն կհայտնվի ճգնաժամի մեջ։ Այս մասին ասել է վարչապետ Նիկոլ Փաշինյանը՝ պատասխանելով ռուսական լրատվամիջոցների ներկայացուցիչների հարցերին։

«Շատ կարևոր է հասկանալ, որ առանց հիմնարար սկզբունքների, առանց Եվրասիական տնտեսական միության հիմնարար սկզբունքների իրականացման հնարավորության՝ ԵԱՏՄ-ն կհայտնվի ճգնաժամի մեջ։

Որովհետև այն, ինչ այժմ տեղի է ունենում հայկական ապրանքների հետ կապված, իհարկե, խնդիր է Հայաստանի Հանրապետության համար։ Սակայն դա ԵԱՏՄ-ի համար ավելի մեծ խնդիր է, քանի որ այժմ գործնականում ստացվում է, որ ԵԱՏՄ-ն չի գործում։ Եթե սկզբունքները չեն գործում, նշանակում է՝ ԵԱՏՄ-ն չի գործում։

Ինչ վերաբերում է Հայաստանին, ես արդեն ասել եմ՝ սա նոր բան չէ։ Մենք բավական երկար ժամանակ է՝ իրականացնում ենք այդ քաղաքականությունը, և, ի դեպ, ոչ միայն մենք։ Բոլոր պետություններն ու կառավարություններն իրականացնում են դիվերսիֆիկացման քաղաքականություն։ Դա ինքնիշխան և օրինական քաղաքականություն է»,- նշել է նա։