«Ալիևը ասել է, Ալիևը չի ասել․․․ կարո՞ղ ենք մի պահ մոռանալ»․ Արման Եղոյան

«Չեմ կարող հստակ ժամկետ նշել ԹՐԻՓՓ նախագծի շինարարության հետ կապված, բայց կարող եմ ասել, որ աշխատանքն առաջ է գնում ամբողջ թափով, ԱՄՆ-ի կողմից կան նշանակված համապատասխան պաշտոնյաներ, մեր կողմից էլ կլինեն»,- ճեպազրույցի ժամանակ ասաց ՔՊ-ական պատգամավոր Արման Եղոյանը։ «Ալիևն ասել է, որ հաջորդ տարի երկաթուղին կհասնի Հայաստանի սահման, իսկ Հայաստանի տարածքում շինարարությունը պետք է սկսվի այս տարի»,- լրագրողի դիտարկմանն ի պատասխան՝ ՔՊ-ականը նշեց․ «Ես ձեզ մի բան ասեմ էլի՝ Ալիևը ասել է, Ալիևը չի ասել․ կարո՞ղ ենք մի պահ մոռանալ։ Ալիևն է ասել, թե Պողոսն է, Պետրոսն է․ եթե շինարարությունը հասնում է Հայաստանի սահմանին, պիտի շարունակվի, չէ՞, դա Ալիևը չի ասում, դա տրամաբանությունն է ասում։ Ինչքան շուտ կատարվի՝ այնքան լավ, անկախ Ալիևի ասել-չասելուց»։