«Ազատագրում կոչվող օպերացիայի ներքո Ռոբերտ Քոչարյանը և նրա համախոհները թալանել են Հայաստանը և Ղարաբաղը»․ Նիկոլ Փաշինյան

Հայաստանի այն քաղաքացիները, ովքեր համարում են, որ Ռոբերտ Քոչարյանի և իր ընտանիքի մի քանի հարյուր միլիոն դոլարի հասնող սեփականությունը օրինական է, կոչ եմ անում դուրս գալ և հեղափոխություն անել»,- այս մասին ԱԺ-ում Կառավարության հետ հարցուպատասխանի ժամանակ հայտարարեց վարչապետ Նիկոլ Փաշինյանը՝ անդրադառնալով «Հայաստան» դաշինքի պատգամավոր Գեղամ Մանուկյանի դիտարկումներին։

«Մեր քաղաքական կամքը այն է, որ Ռոբերտ Քոչարյանենցից ապօրինի ձեռք բերված նույնիսկ կոշիկը վերադարձնելու ենք Հայաստանի Հանրապետությանը։ Հետևաբար, ով որ համաձայն չէ, կոչ եմ անում հեղափոխություն կատարել որովհետև այս գործընթացը կանգնեցնելու ուրիշ ճանապարհ չկա»,- ընդգծեց Փաշինյանը։

Անդրադառնալով Գեղամ Մանուկյանի դիտարկմանը, թե Ռոբերտ Քոչարյանը հայերնիք է ազատագրել՝ Փաշինյանն ընդգծեց․ «Կարծում եմ հիմա և միշտ էլ ակնհայտ է եղել, որ «ազատագրում» կոչվող օպերացիայի ներքո Ռոբերտ Քոչարյանը և նրա համախոհները թալանել են Հայաստանը և Ղարաբաղը»։