«40 վայրկյան տևած հարցազրույցից հետո որոշվեց ՀԷՑ-ը սեփականազրկել․ որքանո՞վ է դա նպաստում ՀՀ-ում ներդրումների գրավչությանը»․ Տիգրան Աբրահամյան

«Վերջին 1 կամ 1 ու կես տարիների ընթացքում Հայաստանում մի քանի դեպք է եղել, որ կոնկրետ ներդրողների շահերը ոտնահարվել են։ Մասնավորապես խոսքը ՀԷՑ-ի մասին է, երբ քաղաքական հայտարարություն էլ չէր, այլ կոնկրետ 40 վայրկյան տևած հարցազրույցից հետո անմիջապես որոշում կայացվեց ընկերության մասով սեփականազրկում իրականացնել, որը հիմա էլ շարունակվում է»,- ԱԺ ֆինանսավարկային և բյուջետային հարցերի մշտական հանձնաժողովի նիստում ԿԲ խորհրդի անդամի պաշտոնում ՔՊ-ական Սևակ Միքայելյանի թեկնածության քննարկման ժամանակ ասաց «Ուժեղ Հայաստան» խմբակցության քարտուղար Տիգրան Աբրահամյանը։ «Իսկ վերջին ամիսներին ականատես եղանք մի գործընթացի, երբ քաղաքականության մեջ գտնվող անձանց մի քանիսի նկատմամբ կոնկրետ քաղաքական դրդապատճառներով ակտիվների խլում տեղի ունեցավ։ Որքանո՞վ է դա նպաստում ՀՀ-ում ներդրումների գրավչությանը»,- շարունակեց ընդդիմադիր պատգամավորը։