«Քաղաքական մրցակցությունը գնալով կորցնում է իր բովանդակային նշանակությունը»․ Մհեր Մելքոնյան

ԱԺ նախկին պատգամավոր Մհեր Մելքոնյանը ֆեյսբուքյան իր էջում գրել է․ «Ամենացավալին այն է, որ մենք հայտնվել ենք մի իրավիճակում, երբ քաղաքական մրցակցությունը գնալով կորցնում է իր բովանդակային նշանակությունը՝ վերածվելով պոպուլիզմի, բարձրագոչ հայտարարությունների և հանրային սպասումների շահարկման մրցավազքի։ Սա պարզապես քաղաքական ճաշակի կամ խոսքի մշակույթի խնդիր չէ․ սա պետական մտածողության, քաղաքական պատասխանատվության և հանրային վստահության լուրջ խնդիր է։ Ցավալի է, որ երկրի առջև ծառացած լրջագույն մարտահրավերների պայմաններում մենք դեռ ստիպված ենք ականատես լինել ոչ թե գաղափարների ու լուծումների մրցակցության, այլ պոպուլիզմի փոխադարձ գերազանցման փորձերի։ Իսկ պետության համար ամենավտանգավորն այն է, երբ քաղաքական աղմուկը սկսում է փոխարինել քաղաքական բովանդակությանը»։