«Ասում են՝ ՊԵԿ-ը դարձել է բարեկամների եկամուտների կոմիտե», «չկա այդպիսի բան»․ բանավեճ՝ Էդուարդ Հակոբյանի և լրագրողների միջև

«Ասում են՝ ՊԵԿ-ը դարձել է բարեկամների եկամուտների կոմիտե, խոսքը միայն ձեր բարեկամների մասին չէ, բարեկամի բարեկամ, ընկերոջ բարեկամ․․․», «ձեր մորաքրոջ որդիներն աշխատում են ՊԵԿ-ում, ի՞նչ են աշխատում և ինչպե՞ս են հայտնվել ՊԵԿ-ում»,- ճեպազրույցի ժամանակ լրագրողների հարցերը վեճի առիթ դարձան: «Չկա այդպիսի բան։ Ինձ համար էական չէ, թե ով է աշխատում ՊԵԿ-ում»,- վրդովվեց ՊԵԿ նախագահ Էդուարդ Հակոբյանը։ «ՊԵԿ-ում գործում է հստակ աշխատանքի անցնելու ընթացակարգ, կա պատրաստման գործընթաց: Եթե մարդիկ այդ գործընթացը չեն անցնում, հավաստագիր չեն ստանում՝ չեն կարողանում անցնել աշխատանքի, իսկ աշխատանքի անցնում են մրցակցային հարցազրույցների հիման վրա։ Ինձ հետ ՊԵԿ եկել են շատ քիչ, սահմանափակ թվով մարդիկ և բոլորն անցել են այն ընթացակարգով, ինչ որ բոլորը»,- շարունակեց Հակոբյանը։