«Այդ ուղերձը ՀՀԿ-ի, ԲՀԿ-ի և ՀՅԴ-ի մեր գործընկերների կողմից ընկալվել է». Նիկոլ Փաշինյան

«Մենք ցույց տվեցինք, որ հենց այսօր Հայաստանում քաղաքական արտահերթ ընտրություններ անցկաացնելը համազգային պահանջ է,- ԱԺ դիմաց տեղի ունեցած հանրահավաքին ասաց վարչապետը:- Եվ այն քաղաքական ուժերն, ովքեր դեմ կգնան ժողովդրի պահանջին, ուղիղ պատերազմ են հայտարարում ժողովրդին: Եվ այդ ուղերձը ՀՀԿ-ի, ԲՀԿ-ի և ՀՅԴ-ի մեր գործընկերների կողից ընկալվել է: Բայց որևէ գրավոր պայմանավորվածություն չկա, միայն բանավոր են խոստացել:

Մենք այսօր ԱԺ դռներն էլ բացեցինք, շնորհավորում եմ ձեզ: Իմ խորհուրդն է, որ ԱԺ դռները, Բաղրամյան 26-ի դռների պես, բաց լինեն ժամը 10:23-ը: Սա նշան կլինի, որ պատգամավորները հասկանում են ժողովրդի ուղերձը»:

Նիկոլ Փաշինյանն ասաց, որ մտադիր է անպայման մասնակցել Շառլ Ազնավուրի վերջին հրաժեշտի արարողություններին:

«Հեռախոսազրույց ունեցա նախագահ Արմեն Սարգսյանի հետ և իմ տպավորությամբ ինքը բնականաբար ժողովրդի դեմ որևէ քայլ չի անի, բայց ինքը Նյու Յորքում է, ինքն էլ կգա Փարիզ՝ մասնակցելու Ազնավուրի հուղարկավորությանը: Մենք կհանդիպենք, կզրուցենք, միասին կգանք Հայաստան: Դրանից հետո ես հրաժարական կտամ՝ մնալով վարչապետի պաշտոնակատար, ինձ նման նաև՝ կառավարության անդամները:

Իմ հրաժարականի պահից քաղաքական պրոցեսների ամբողջ վերահսկողությունը կիրականացնի ժողովուրդը, և եթե Հայաստանի Հանրապետության քաղաքացիները կտան տեսական հնարավորություն խորհրդարանական ուժերին առաջադրել վարչապետի թեկնածու, նրանք դա կանեն: Իշխանությունը ձերն է, դուք ինչպես որ կորոշեք, այնպես էլ կլինի»: