Կառավարությունը շուրջ 6 մլրդ դրամ ուղղեց 1141 զինծառայողի բնակարանային խնդիրը լուծելու համար

Այսօր՝ Կառավարության այս տարվա վերջին նիստի ժամանակ, ՀՀ պաշտպանության նախարարի պաշտոնակատար Դավիթ Տոնոյանը քննարկման ներկայացրեց որոշման նախագիծ՝ ըստ որի նախատեսվում է Կառավարության պահուստային ֆոնդից ՊՆ-ին հատկացնել 5 մլրդ 705 մլն դրամ՝ զինվորական ծառայության ընթացքում որպես բնակարանային պայմանների բարելավման համար կարիք ունեցող հաշվառված, սակայն զինվորական ծառայության ընթացքում բնակարանային ապահովություն չստացած և առողջության կամ տարիքի կամ երկարամյա ծառայության զինվորական կենսաթոշակի անցնելու կապակցությամբ զինվորական ծառայությունից սահմանված կարգով արձակված մոտ 1141 նախկին զինծառայողների, որոնցից 326-ը՝ Երևան քաղաքում: Բնակարանային պայմանները բարելավելու համար միջինը 5 մլն դրամ արժեքով բնակարանի գնման վկայագրեր տրամադրելու համար: Որոշման նախագիծը ՀՀ առաջին փոխվարչապետի պաշտոնակատար Արարատ Միրզոյանը լրջագույն քայլ համարեց. որոշումն ընդունվեց միաձայն: