Այսօր Սիմոն Աչիկգյոզյանի (Դեդ) ծննդյան օրն է

«Ես ոչ մեկիդ մահը չեմ ուզում տեսնել, թող ինչ լինում է, ինձ լինի, ձեզ չլինի...», «Զոհվելուց չեմ վախենում, միայն՝ թուրքի ձեռքը մարմնիս չդիպչի». այս խոսքերի հեղինակը ազատամարտիկ Սիմոն Աչիկգյոզյանն է (Դեդ):

Երկրաբանական գիտությունների թեկնածու, ՀՅԴ կուսակցության և «Զորավար Անդրանիկ» համազգային միության անդամ, արցախյան պատերազմի ակտիվ մասնակից Սիմոն Աչիկգյոզյանը ծնվել է 1939 թվականին Գալացում (Ռումինիա): Հայրը՝ Հովհաննեսը, եղեռնից հրաշքով է փրկվել։ 1946-ին ընտանիքի հետ ներգաղթել է Խորհրդային Հայաստան։

Սիմոն Աչիկգյոզյանը սովորել է Երևանի պետական համալսարանի երկրաբանության ֆակուլտետում։ 1970-ին Մոսկվայում պաշտպանել է թեկնածուական թեզ: Աշխատել է ՀԽՍՀ ԳԱԱ երկրաբանության ինստիտուտում, դասախոսել Երևանի պետական համալսարանում։

1989-ին անդամագրվել է «Արաբո» կամավորական ջոկատին, մասնակցել Եղեգնաձորի և Նոյեմբերյանի գյուղերի ինքնապաշտպանական մարտերին։ Եղել է Մարտունաշենի պաշտպանության ջոկատի հրամանատարը։

Ս. Աչիկգյոզյանը զոհվել է 1991 թվականին ապրիլի 30-ին Մարտունաշենի ինքնապաշտպանության ժամանակ՝ ԽՍՀՄ ներքին գործերի նախարարության ուժերի աջակցությամբ ադրբեջանական հատուկ նշանակության զինված ջոկատների (ՕՄՕՆ) կողմից իրագործվող Արցախը հայաթափելու «Օղակ» (кольцо) գործողությունը կանխելիս։ Նրա աճյունն ամփոփված է Երևան քաղաքի Քանաքեռ-Զեյթուն վարչական տարածքի գերեզմանատանը։
1996 թվականին, նախագահի ՆՀ-640 հրամանագրով, Ս. Աչիկգյոզյանը հետմահու պարգևատրվել է «Մարտական խաչ» 1-ին աստիճանի շքանշանով։
Ամուսնացած էր, ունի երկու զավակ։ 2011 թվականին երկրաբանության ֆակուլտետի միներալոգիայի և պետրոգրաֆիայի կաբինետը անվանակոչվել է Ս. Աչիկգյոզյանի անվամբ: