«Քոչարյանի հարցով պաշտոնական Ստեփանակերտին օգտագործում են. դա վտանգավոր է». վերլուծաբաններ

Այսօր Արցախի նախագահ Բակո Սահակյանը և երկրորդ նախագահ Արկադի Ղուկասյանը դիմել էին Հայաստանի գլխավոր դատախազ Արթուր Դավթյանին՝ խնդրելով մայիսի 9-ին ընդառաջ փոխել Ռոբերտ Քոչարյանի խափանման միջոցը՝ թույլ տալով, որ վերջինս մասնակցի Արցախում նախատեսված տոնակատարություններին:

Վերլուծաբան Հակոբ Բադալյանը «Առաջին լրատվական»-ի եթերում նշել է, որ նրանք, ովքեր Արցախի գործող և նախկին նախագահներին խորհուրդ են տվել դիմում գրել, թերացել են իրավական առումով, քանի որ գործն արդեն գտնվում է դատարանում և դատախազության իրավասության տիրույթից դուրս է:

«Արցախում թափ է առել 2020թ. տեղի ունենալիք խորհրդարանական և նախագահական ընտրությունների արշավը, ներգրավված դերակատարները նախկին համակարգի տարբեր թևեր են, և այս համատեքստում հետաքրքիր տողատակեր կարող են լինել՝ բացի ընդհանուր համակարգային շահից»,- նշել է Բադալյանը:

Վերլուծաբան Մհեր Ղալեչյանը չի բացառում, որ վերոնշյալ դիմումի շարժառիթը կարող է լինել Մարտի մեկի գործով դատավարությունը:

Նրա դիտարկմամբ՝ մանիպուլյացիայի վառ վկայություն է այն, որ հարյուրավոր քաղբանտարկյալներ են եղել նաև Ռ. Քոչարյանի օրոք, և թեև նրանցից շատերն ազատամարտիկներ էին, բայց ոչ մեկի համար երբևիցե Արցախի իշխանությունները չեն բարեխոսել, այսպիսի դիմում չեն գրել:

Ըստ վերլուծաբանների՝ Արցախի նախկին և ներկա նախագահների խնդրանքը աջակցություն էր Ռոբերտ Քոչարյանին:

Վերլուծաբաններն այն համոզմանն են, որ Քոչարյանի հարցով պաշտոնական Ստեփանակերտին օգտագործում են, ինչը վտանգավոր է: