Երեքշաբթի, 19 նոյեմբերի, 2019 թ.
|
Ստեփանակերտում`   +1 °C

«Եթե գնամ, կյանքիս վերջ կտամ»․ զորակոչիկի հետ տեղի ունեցած արտասովոր միջադեպի մանրամասները

«Եթե գնամ, կյանքիս վերջ կտամ»․ զորակոչիկի հետ տեղի ունեցած արտասովոր միջադեպի մանրամասները
334
Հինգշաբթի, 04 հուլիսի, 2019 թ., 15:05

«Զինծառայողի մոտ նյարդային հիվանդության առկայությունը հաստատվելու դեպքում զինծառայողը կզորացրվի: Կան նյարդային հիվանդության տարբեր աստիճաններ, որոնց պարագայում անձը կարող է զորակոչվել կամ չզորակոչվել բանակ: Եթե պարզվի, որ զորակոչվելու ենթակա չէր, կզորացրվի»,- MAMUL.am-ի զրույցում ասաց ՀՀ ՊՆ մամուլի խոսնակ Արծրուն Հովհաննիսյանը՝ անդրադառնալով 19-ամյա զինծառայող Նարեկ Ս-ի միջադեպին:

Արծրուն Հովհաննիսյանը նշեց նաև, որ եթե ապացուցվի, որ զինծառայողը բանակ է զորացրվել նևրոտիկ այնպիսի հիվանդության պարագայում, որի դեպքում պետք է օրենքով չզորակոչվեր, կնշանակի, իրավասու հանձնաժողովը ժամանակին զորակոչման ենթակա լինելու մասին սխալ եզրակացություն տալով իր աշխատանքում թերացել է:

Զինծառայողի նևրոտիկ հիվանդ լինելու մասին MAMUL.am-ի հետ զրույցում նշեց Երևանի կայազորային հոսպիտալի տնօրեն Մհեր Սերոբյանը:

«Ըստ նախնական ախտորոշման՝ զինծառայողը նևրոտիկ հիվանդ է: Դա նշանակում է, որ նա կարող էր նախկինում ասել մի բան, իսկ հետո նշել, թե նման բան չի ասել: Դրանով է բացատրվում, որ ծնողների մոտ ասել է՝ կյանքին վերջ կտա, մեզ մոտ՝ հրաժարվել է ասածից: Հնարավոր է՝ վաղը նորից ասի նախկինում ասածը: Ծնողների խոսքով՝ իրենց որդու մոտ մինչև բանակ զորակոչվելն էլ նմանատիպ խնդիր եղել է, դա նոր բան չէ»,-ասաց բուժհաստատության տնօրենը: Երբ նախնական ախտորոշումը կհաստատվի, կորոշենք, թե ինչ ենք անում: Բնականաբար, զինծառայողին պետք է հետազոտել և բուժել»,-ասաց մեր զրուցակիցը:

Հիշեցնենք, որ հունիսի 30-ին զինծառայողը հրաժարվել էր արձակուրդից հետո վերադառնալ զորամաս՝ հայտարարելով, որ եթե վերադառնա, իր կյանքին վերջ կտա: