«Ադրբեջանական սադրանքին լինում է ոչ պակաս ու համարժեք պատասխան». Արտակ Դավթյան

ՀՀ ԶՈՒ գլխավոր շտաբի պետ Արտակ Դավթյանը լրագրողների հետ զրույցում ասաց, որ սահմանային լարվածությունը կապված չի եղել ՀՀ զինված ուժերի գործողությունների հետ:

«Իրականացվածը դիտարկում եմ որպես ադրբեջանական կողմից սադրանք: Մեր զինված ուժերը համապատասխան գործողություններ իրականացրել են՝ ի պատասխան այն սադրանքների, որոնք եղան: Ցավոք, ունեցանք զոհ և վիրավոր, նման դեպքեր միշտ եղել են, ինչքան էլ ցավալի լինի, սպասում ենք, որ էլի՛ կլինեն»,- ասաց Ա.Դավթյանը՝ ավելացնելով, որ սադրանքի պատասխանը լինում է ոչ պակաս ու համարժեք:

Ըստ նրա՝ հայ-ադրբեջանական սահմանին նման միջադեպեր վերջին օրերին արձանագրվել են, սակայն քանի որ զոհեր չեն եղել, արձագանք չի եղել:

Անդրադառնալով զինտեխնիկայի ներկրման թեմային՝ ասել է, որ կնքված պայմանագրերի համաձայն, սկսվել է և շարունակվելու է սպառազինության ներկրումը:

«Ռազմական տեխնիկան ներառում է հակաօդային, հակահրթիռային պաշտպանության էլեմենտները, հեռահար, ճշգրիտ խոցման միջոցները՝ ավելացնելով հետախուզության կրակային միջոցները զինված ուժերում»:

Ա. Դավթյանը հայտնել է, որ ինքն օրեր առաջ եղել է Արցախում: Այնտեղ փորձարկում են անցել արցախյան ռազմարդյունաբերության կողմից մշակված որոշ զինատեսակներ: ՀՀ-ում հույս ունեն, որ երկու հայկական պետությունների համագործակցության շրջանակում ՀՀ-ն Արցախից կվերցնի որոշ արդյունավետ զինատեսակներ, որովհետև դրանք գին-որակ համադրության մեջ դրանք հետաքրքիր են: