«Եթե ոչինչ չեք անելու, ինչո՞ւ եք խախտում այդ մարդկանց հոգեկան աշխարհը». Ժաննա Ալեքսանյան

Իրավապաշտպան Ժաննա Ալեքսանյանը ֆեյսբուքյան իր էջում գրել է. «Այսօր դատավոր Վահե Խալաթյանը մերժել է 24 տարի անազատության մեջ գտնվող ցմահ դատապարտյալ Աշոտ Մանուկյանին վաղաժամկետ ազատ արձակել: Ցմահականին տրվել էր լավ բնութագրեր, նրան ներել էին տուժողները, ընդ որում գրավոր, սակայն արդարադատության նախարարությունը գտել էր, որ նրա հանցագործություն կատարելու ռիսկը մեծ է և ահա դատարանը առաջնորդվել է հենց այս «հիմնավորմամբ» ու մերժել: Հանցագործություն կատարելու ռիսկը մեծ է. խորհրդային մի ձևակերպում է, որը պարզվում է ցանկացած դեպքում կարելի է օգտագործել, իսկ արդարադատության նորանշանակ նախարարն ասում էր, որ բարելավվելու են վաղաժամկետ ազատ արձակման պայմանները: Եթե ոչինչ չեք անելու, ինչու եք խախտում այդ մարդկանց հոգեկան աշխարհը, ինչու եք հուսադրում նրանց և նրանց հարազատներին: Հեղափոխությունից հետո սկսվեց շրջանառվել ցմահների անունները, սակայն նրանց ազատման հարցում որևէ առաջընթաց չկա: Համատարած անտարբերություն մարդու նկատմամբ: Նրանց մեջ անմեղ դատապարտվածներ կան, մասնավորապես զինվորական գործերով»: