Մեր հերոսը. Արմինա Նալբանդյան՝ վիրաբույժ, ազատամարտիկ

«Ռազմական արխիվ 1990-1994» ֆեյսբուքյան էջը գրում է. «Արմինա Նալբանդյան՝ վիրաբույժ, ազատամարտիկ, բժշկական ծառայության ավագ լեյտենանտ:

Ծնվել է 1967 թվականի հուլիսի 15-ին, Երևանում։
1983 թ․ միջնակարգ դպրոցը ավարտելուց հետո ընդունվել է Երևանի պետական բժշկական ինստիտուտի բուժական ֆակուլտետ, որը ավարտել է 1989 թ․։

1989-1992 կլինիկական օրդինատուրան անցել է Երևանի հանրապետական հիվանդանոցում (այժմ՝ «Արմենիա» հանրապետական բժշկական կենտրոն)։

1993 թվականի գարնանը ամուսնու՝ Արտակ Խաչատրյանի հետ կամավոր մեկնում է ԼՂՀ Շահումյանի շրջան։

Նույն թվականի ապրիլի 17-ին ուղղաթիռը, որում գտնվում էր Արմինայի ամուսինը ու ևս 11 հոգի, այդ թվում Շահեն Մեղրյանը, խոցվում է թշնամու կողմից։ Բոլորը զոհվում են։

Ամուսնու զոհվելուց հետո «Եղնիկներ» պարտիզանական ջոկատի հենակետում ղեկավարել է ռազմադաշտային շարժական հոսպիտալի աշխատանքները։

Մասնակցել է Շահումյանի, Մարտակերտի շրջանների ինքնապաշտպանությանը։

Պարգևատրվել է ԼՂՀ «Արիության համար» մեդալով։

Այժմ ապրում է Երևանում և աշխատում է «Արմենիա» հանրապետական բժշկական կենտրոնի 2-րդ վիրաբուժական բաժանմունքում»։