«Ո՞ր դրվագներով է իրեն մեղավոր ճանաչել նախկին ոստիկանապետը». Գոհար Վեզիրյան

Լրագրող Գոհար Վեզիրյանը ֆեյսբուքյան իր էջում գրել է․ «Ինքնասպանությունը միշտ էլ հարցեր է առաջացնում: Պետական պաշտոնյայի դեպքում՝ անկասկած: Նորանկախ Հայաստանի ամենածանր քաղաքական իրադարձությունների առանցքային դեմքերից է եղել Հայկ Հարությունյանը: Թերթեք 2008-ի մամուլը՝ լուռ ու դանդաղ: Բայց ես, մեկ է, դավադրական տեսությունների սիրահար չեմ, պարզապես որպես մարդ ուզում եմ իմանալ-հասկանալ-վերլուծել՝ ի՞նչն է դրդել մարդուն ինքնասպանության: Կամ ի՞նչ է մտածել վերջին պահին, ո՞ր դրվագներով է իրեն մեղավոր ճանաչել նախկին ոստիկանապետը, հայացքն ուղղե՞լ է վերև ու ինքն իր հետ առերեսմանը չի դիմացե՞լ: Չգիտեմ. բոլոր դեպքերում ինքնասպանությունը ծանր է, այն չի ազատում մեղքից, ճիշտ հակառակը: Քրիստոնեությունը ամենից առաջ մարդասիրություն է, և ես աղոթում եմ բոլոր մեղավորների հոգու փրկության համար»: