«Իմ մտքով երբեք չի անցել, որ չդատապարտողներն ընտրողական մոտեցում ունեն». Ժաննա Ալեքսանյան

Իրավապաշտպան Ժաննա Ալեքսանյանը ֆեյսբուքյան իր էջում գրել է. «Իմ հարգարժան ընկեր Հայկ Ալումյանը երեկ մի գրառում է արել, որով մեղադրել է իրավապաշտպաններին երկու դատավորների՝ Աննա Դանիբեկյանի և Ալվինա Գյուլումյանի նկատմամբ ճնշումների հետ կապված ընտրողական մոտեցման համար: Անկեղծ ասած, ես հենց այդ գրառումից էլ տեղեկացա ՍԴ դատավորի նկատմամբ «ֆիզիկական և հոգեբանական» ճնշումների մասին: Մի կերպ գտա տեսանյութը, ակնհայտ է, որ Գյուլումյանի միջադեպն այնպիսի տարածում չի գտել, ինչպես Դանիբեկյանի դեպքում և դեպքերն էլ հանրային ուշադրությանն արժանանալու համար տարբեր են: Ամեն դեպքում, անհարգալից վերաբերմունքը ՍԴ դատավորի նկատմամբ ակնհայտ էր: Ես դատապարտում եմ ցանկացած բռնության դրսևորում և ընտրողական մոտեցման մասին խոսք անգամ լինել չի կարող: Վստահ եմ, որ նույն մոտեցումն ունեն մեր մյուս գործընկերները: Հայկ ջան, ուղղակի, երբ Քոչարյանի համակիրները մեկնարկող դատական նիստին դատարանի բակում քաշքշում էին փաստաբան Սեդա Սաֆարյանին, առանձնապես դատապարտող փաստաբաններ չգտնվեցին, բայց իմ մտքով երբեք չի անցել, որ չդատապարտողներն ընտրողական մոտեցում ունեն»: