«Չեմ կարծում, որ ՍԴ-ն բացասական որոշում կկայացնի Հ. Թովմասյանի լիազորությունները դադարեցնելու նախաձեռնության վերաբերյալ». վարչապետի խոսնակ

«ՍԴ նախագահ Հրայր Թովմասյանը հայտնի հանրապետական է, որը աչքի է ընկել իրարամերժ հայտարարություններով, մինչև կուսակցական դառնալը, այնուհետև նաև կուսակցական դառնալուց հետո, Մարտի 1-ի հարցով է բազմիցս հանդես եկել քննադատական հայտարարություններով»,- այսօր Հանրային հեռուստաընկերության եթերում ասաց ՀՀ վարչապետի մամուլի քարտուղար Վլադիմիր Կարապետյանը:

Խոսնակի խոսքով՝ Հրայր Թովմասյանի, նրա խորհրդականի, աշխատակազմի ղեկավարի արած հայտարարությունները վաղուց դուրս են եկել իրավական հարթությունից և քաղաքական հայտարարություններ են դարձել. «Ժամանակը եկել է, որ Սահմանադրական դատարանը նույնպես իր տեղը գտնի նոր Հայաստանում»,- ընդգծեց Կարապետյանը:

Վարչապետի խոսնակը կարծում է, որ ՍԴ-ն ևս չի կարողանա անտեսել այն փաստարկները, որ բերվել են ԱԺ-ում:

Եթերի ընթացքում նա նաև նշեց, որ չի կարծում, որ Սահմանադրական դատարանը բացասական որոշում կկայացնի «Իմ քայլի»՝ Հրայր Թովմասյանի լիազորությունների դադարեցման նախաձեռնությանը . «Այս ճգնաժամը չի կարող անվերջ շարունակվել և վստահ եմ, որ ելքեր կգտնվեն, որպեսզի Հայաստանը ի վերջո կանգնի լիարժեք զարգացման ուղու վրա»,- ասաց նա:

Առավել մանրամասն՝ տեսանյութում: