«Բայց Մնացականյանի բախտը դեռ բերել է». Տիգրան Գրիգորյան

Արցախի «Ազգային վերածնունդ» կուսակցության անդամ Տիգրան Գրիգորյանը ֆեյսբուքյան իր էջում գրել է. «Մնացականյանի հարցազրույցը շատ թույլ էր։ Հատկապես հակամարտության հատվածը։ Ու խնդիրը հենց իր պրոֆեսիոնալ ունակությունների մեջ է։ Հմուտ դիվանագետը պետք է կարողանա նույնիսկ ամենաանհարմար հարցերին պատասխանել ու ամենաանելանելի իրավիճակն իր օգտին օգտագործել։ Այդ առումով ինձ համար էտալոնն Իրանի արտգործնախարար Ջավադ Զարիֆն է, ով, շատ ավելի բարդ վիճակներում գտնվելով, միշտ հաղթող է դուրս գալիս։ Այս դեպքում հարցերն այդքան էլ բարդ չէին։ Սաքուրի պնդումները բավականին մակերեսային էին։ Վիքիպեդիայի մակարդակի ինֆորմացիայի էր տիրապետում։ Կարելի էր ավելի համոզիչ պատասխաններ տալ այդ հարցերին։ Բայց Մնացականյանը նրա մի շարք կեղծ պնդումները հերքելու փորձ չարեց, այլ, ընդունելով դրանք, սկսեց արդարանալ։ Արդյունքում հեռուստադիտողները հակամարտության վերաբերյալ թյուր պատկերացումներ ունեցան։
Բայց հանուն ճշմարտության պետք է նշել, որ քչերն են կարողանում պատվով դուրս գալ բրիտանացի այս «գիշատիչ լրագրողների» «հարցաքննություններից»։ Օրինակ՝ Պորոշենկոն ու Սաակաշվիլին ևս «հարցաքնվել էին» այս հաղորդման շրջանակներում և նույնպես համոզիչ չէին հնչում։ Բայց Մնացականյանի բախտը դեռ բերել է, որ Էնդրյու Նիլի կամ Ջերեմի Փաքսմանի ճանկը չի ընկնել։ Վերջինս մի երեք տարի առաջ ընտրությունների նախօրեին ուղիղ եթերով Թերեզա Մեյին էր լացացրել»։