Մանվել Գրիգորյանի պաշտպանը միջնորդեց խափանման միջոցի փոփոխման համար բնակարաններ գրավադրել

ԱԺ նախկին պատգամավոր Մ. Գրիգորյանի գործով այսօրվա նիստում քննվեց պաշտպան Լևոն Բաղդասարյանի միջնորդությունը՝ իր պաշտպանյալին գրավով ազատ արձակելու վերաբերյալ: Քանի որ Մ. Գրիգորյանի գույքը կալանքի տակ է, պաշտպանը միջնորդեց որպես գրավ ոչ թե դրամական միջոցով վճարել, այլ անշարժ գույքով՝ 1 մլրդ 670 մլն 950 հազար և 1 մլրդ 336 մլն 718 հազար արժեք ունեցող 25 բնակարաններով: Դրանց վկայականներն ու այլ փաստաթղթեր պաշտպանը հանձնեց դատարանին: Դատավոր Մնացական Մարտիրոսյանն էլ նշեց, որ դրանք կուսումնասիրվեն:

Նիստում դատավորն ընթերցեց ՀՔԾ-ի գրությունը, որով թույլատրվում էր հարցաքննել Մանվել Գրիգորյանին:

Դատական նիստը հետաձգվեց: Հաջորդ նիստը տեղի կունենա դեկտեմբերի 24-ին, ժամը 14.00-ին, իսկ դրանից 1 ժամ անց՝ 15.00-ին՝ Նազիկ Ամիրյանի՝ անջատված մասով գործով դատական նիստը:

Հիշեցնենք, որ Մ. Գրիգորյանի և նրա տիկնոջ գործերը դատարանը քննում էր միասին, սակայն հաշվի առնելով Մ. Գրիգորյանի բացակայությունները, Ն. Ամիրյանի գործն անջատվեց: