«Սա արժանապատվությունը նվաստացնող վերաբերմունք է». Արթուր Սաքունց

ՀՔԱ Վանաձորի գրասենյակի ղեկավար Արթուր Սաքունցը «Զորակոչիկների իրավունքների վիճակը 2018 ձմեռային և 2019 ամառային զորակոչերի ընթացքում» թեմայով քննարկման ժամանակ մատնանշեց մի շարք խնդիրներ, որոնք տարիներ շարունակ առկա են և լուծում չեն ստանում: Դրանք թե՛ տեխնիկական են, թե՛ իրավական: Այսպես, կառավարության որոշման համաձայն՝ զինակոչիկը զորակոչի ընթացքում ծառայության համար ոչ պիտանի համարվում է 5 և ավելի հիվանդությունների առկայության պայմաններում: ՀՔԱ Վանաձորի գրասենյակի ղեկավար Արթուր Սաքունցը «Զորակոչիկների իրավունքների վիճակը 2018 ձմեռային և 2019 ամառային զորակոչերի ընթացքում» թեմայով քննարկման ժամանակ ասաց, որ նախ՝ շատ քիչ են նման զորակոչիկները, և երկրորդ՝ լինելու դեպքում էլ այդ դրույթը կիրառվում է միայն զորակոչի ընթացքում ընկած ժամանակահատվածի համար: Իսկ ծառայության ընթացքում այն չի կիրառվում:

Բանախոսը նկատեց, որ զինակոչիկների բուժզննության անցկացման կարգում էլ խնդիր կա: 100 հոգու հրավիրում են զինկոմիսարիատ:

«Բաժանեք ժամերի: 100 հոգի առավոտվա ժամը 9-ից մինչև 17-ը կարող են սպասել: Ձմեռվա պայմաններում, եթե շենքային պայմաններ չկան, մարդիկ կարող են հիվանդանալ: Սա արժանապատվությունը նվաստացնող վերաբերմունք է: Դա ընդամենը զուտ տեխնիկական խնդիր է:

Ա.Սաքունցն այն կարծիքը հայտնեց, որ զորակոչը պետք է կազմակերպվի քաղաքացիական ինստիտուտի կողմից: Նախկինում զինկոմիսարիատները պատկանել են Գլխավոր շտաբին, վերջերս արված փոփոխությամբ դրանք անցան ՊՆ-ի ենթակայությանը: Դա ՀՔԱ Վանաձորի գրասենյակի ղեկավարը կեսքայլ համարեց: