Հայկ Սարգսյանի պաշտպանը մեղադրանքը վերաորակելու միջնորդություն ներկայացրեց

Երևանի ընդհանուր իրավասության դատարանում, դատավոր Աննա Դանիբեկյանի նախագահությամբ, հունվարի 31-ին տեղի ունեցավ Սերժ Սարգսյանի եղբորորդու՝ Հայկ Սարգսյանի գործով հերթական նիստը։

Նիստում մեղադրյալի պաշտպան Երեմ Սարգսյանը հիշեցրեց, թե նախկինում ինչ միջնորդություններ են արվել, որոնք մերժվել են: Պաշտպանը կրկին միջնորդեց իրենց տրամադրել փորձագիտական եզրակացության փաստաթղթերը, վկաներից մեկի՝ Խաչատուր Խաչատրյանի ցուցմունքները: Երեմ Սարգսյանը դատարանից խնդրեց նաև պարզաբանել մեղադրանքի էությունը:

Մեղադրող կողմը՝ դատախազ Աբգար Առաքելյանն առարկեց: Ըստ նրա՝ նախաքննության ժամանակ գործին կցված, դատարանին ներկայացրած փաստաթղթերը հրապարակվում են, եթե դրանցում ապացուցված կամ հաստատված են գործի համար էական նշանակություն ունեցող հանգամանքներ: Տվյալ պարագայում այդ հանգամանքը բացակայում է:

«Ինչ վերաբերում է վկայի ցուցմունքներին, ապա դրանք ենթակա չեն հրապարակման, որովհետև չկան հակասություններ նախաքննական ու դատաքննական ցուցմունքների միջև: Ուստի՝ ներկայացված միջնորդությունը անհիմն է և մերժման ենթակա»,- նկատեց մեղադրողը:

Պաշտպան Ե.Սարգսյանը ճշտեց, որ ինքը ոչ թե ցուցմունքն է պահանջում, այլ հարցաքննության ժամանակ տրված քննիչի հարցը, որը գործի համար էական նշանակություն ունի:

Դատավոր Աննա Դանիբեկյանը, կողմերին լսելուց հետո հայտարարեց, որ վկայի ցուցմունքների հրապարակման հիմքերն արձանագրված են Քրեական դատավարության օրենսգրքի 342-րդ հոդվածով, և դատարանը պաշտպանի ներկայացրած միջնորդությանը սահմանված կարգով արդեն անդրադարձել է: Ուստի՝ դատարանը, գտնելով, որ հարցաքննության մեջ արձանագրված տեղեկությունները հրապարակելու վերաբերյալ միջնորդությունը չի բխում ՀՀ Քրեական դատավարության օրենսգրքի պահանջներից, այն մերժեց: Միևնույն ժամանակ նշվեց, որ պաշտպանը կարող է դատարանից վկայի լրացուցիչ հարցաքննություն պահանջել:

Պաշտպան Ե. Սարգսյանը միջնորդության մերժումը անօրինական որակեց:

Մեղադրող Ա. Առաքելյանը հարկ համարեց հիշեցնել, որ պաշտպանը մեկ այլ միջնորդություն էլ է ներկայացրել. Հ. Սարգսյանին առաջադրված մեղադրանքը վերաորակել և նրան առաջադրել Քրօրենսգրքի 120-րդ հոդվածի 1-ին մասով նախատեսված մեղադրանք. այն է՝ անզգուշությամբ մարմնական ծանր վնասվածք հասցնելը: Դատախազը խոստացավ դրան անդրադառնալ առաջիկայում:

Հիշեցնենք, որ Հ.Սարգսյանին մեղադրանք է առաջադրվել ՀՀ ՔՕ 34-104-րդ հոդվածի 1-ին (սպանության փորձ) մասի և 235-րդ հոդվածի 1-ին մասի (զենք-զինամթերք ձեռք բերելու և պահելը) հատկանիշներով։

Այնուհետ դատարանն անցավ իրեղեն ապացույցների հետազոտման փուլին: Հետազոտվեց ատրճանակը: Դատախազ Ա.Առաքելյանը հայտնեց, որ ձեռնարկվել են հնարավոր բոլոր միջոցները՝ ԱՄՆ-ում բնակություն հաստատած վկա Աշոտ Սիմոնյանին հարցաքննելու ուղղությամբ: Հետաքննության մարմնին հանձնարարություն է տրվել, որպեսզի վկայի հետ կապ հաստատելու մի վերջին հնարավորություն էլ գտնվի, և քննարկվի վկային տեսակապով հարցաքննելու հնարավորությունը: Դա Հ.Սարգսյանի պաշտպան Ե.Սարգսյանը դատավարության անհարկի ձգձգում որակեց և դատարանից խնդրեց նշյալ վկային դատական գործընթացում այլևս չդիտարկել:

Դատավոր Աննա Դանիբեկյանը հայտարարեց, որ պետք է հնարավորություն տրվի տեղեկություններ ստանալ նշյալ վկայի վերաբերյալ, ուստի՝ նիստն այդքանով ավարտվեց, և հաջորդ նիստի օր ու ժամ հայտարարվեց փետրվարի 20-ի, ժամը 15.00-ը: